కేసీఆర్ స్పీచ్.. టీఆర్ఎస్ ఎమ్మెల్యేల‌కు షాక్!

హైదరాబాద్ : 22/07/2021

కేసీఆర్ స్పీచ్.. టీఆర్ఎస్ ఎమ్మెల్యేల‌కు షాక్!

తొలివెలుగు మీడియా ట్విట్టర్ సౌజన్యంతో 

“హుజురాబాద్ ఉప ఎన్నిక‌ కోస‌మే ద‌ళిత బంధు“ అని ముఖ్య‌మంత్రి కేసీఆర్ ఇచ్చిన ఓపెన్ స్టేట్‌మెంట్… ఓట‌ర్లను తెగ‌ ఆక‌ట్టుకుంటోంది. రాష్ట్ర‌వ్యాప్తంగా ప్ర‌జ‌లు కేసీఆర్ చేసిన‌ ప్ర‌క‌ట‌న‌ను మ‌నస్ఫూర్తిగా స్వాగ‌తిస్తున్నారు. ఉప ఎన్నిక‌కు ఇంత ప‌వ‌ర్ ఉంటుంద‌ని తాము అనుకోలేద‌ని.. ఆల‌స్యంగా అయినా త‌మ క‌ళ్లు తెరిపించార‌ని కొనియాడుతున్నారు. త‌మ‌కూ వెంట‌నే అలాంటి సంక్షేమ ప‌థ‌కాలు కావాల‌ని కోరుతూ.. ఇప్పుడు కొత్త ఉద్య‌మం మొద‌లుపెట్టారు.

తెలంగాణ వ్యాప్తంగా టీఆర్ఎస్ ఎమ్మెల్యేల రాజీనామాకు డిమాండ్లు వెల్లువెత్తుతున్నాయి. ద‌యచేసి రాజీనామా చేయండి.. ఉప ఎన్నిక‌ను తెచ్చి నియోజ‌క‌వ‌ర్గాన్ని అభివృద్ధిప‌ర‌చండి అని కోరుతున్నారు. సోష‌ల్ మీడియాలో ఇప్పుడు పెద్ద ఎత్తున ఈ క్యాంపెయిన్ న‌డుస్తోంది. ఎక్క‌డిక‌క్క‌డ నెటిజ‌న్లు త‌మ త‌మ నియోజ‌కవ‌ర్గ ఎమ్మెల్యేల‌ను రాజీనామా చేయాల‌ని డిమాండ్ చేస్తున్నారు. కొత్త పెన్ష‌న్లు, కొత్త రేష‌న్ కార్డులు, కొత్త కొత్త ప‌థ‌కాలు త‌మ‌కూ కావాల‌ని నిల‌దీస్తున్నారు. కేసీఆర్‌ను అడిగి నిధులు తీసుకొచ్చే దమ్మూ, ధైర్యం ఎలాగూ ఉండదు కాబ‌ట్టి. . క‌నీసం ఎమ్మెల్యేగా గెలిపించినందుకైనా రాజీనామా చేసి కృత‌జ్ఞ‌త చాటుకోవాల‌ని విజ్ఞ‌ప్తి చేస్తున్నారు.

మొన్న‌టివ‌ర‌కు టీఆర్ఎస్‌లో చేరిన కాంగ్రెస్ ఎమ్మెల్యేలు రాజీనామా చేయాల‌ని మాత్ర‌మే సోష‌ల్ మీడియాలో పోస్టులు క‌నిపించేవి. కానీ ఎప్పుడైతే హుజురాబాద్ కోసమే ద‌ళిత బంధు అని కేసీఆర్ ప్ర‌క‌ట‌న చేశారో.. అప్పటి నుంచి రాష్ట్ర‌వ్యాప్తంగా అన్ని నియోజ‌క‌వ‌ర్గాల్లోనూ ఎమ్మెల్యేల రాజీనామాల‌కు డిమాండ్లు వెల్లువెత్తుతున్నాయి.