బీసీల ఆత్మగౌరవాన్ని దెబ్బతీస్తే హైకోర్టును ఆశ్రయిస్తాం - ప్రభుత్వానికి ఎమ్మెల్సీ డా. దాసోజు శ్రవణ్ హెచ్చరిక

*బీసీ సంక్షేమ శాఖ మంత్రి పొన్నం ప్రభాకర్‌కు ఎమ్మెల్సీ దాసోజు శ్రవణ్ సంచలన లేఖ*

*బీసీల ఆత్మగౌరవాన్ని దెబ్బతీస్తే హైకోర్టును ఆశ్రయిస్తాం -  ప్రభుత్వానికి ఎమ్మెల్సీ డా. దాసోజు శ్రవణ్ హెచ్చరిక*

బాపట్ల కృష్ణమోహన్, మీడియా టుడే, నవంబర్ 04:

బీఆర్ఎస్ ఎమ్మెల్సీ డా. శ్రావణ్ దాసోజు మంత్రివర్యులు పొన్నం ప్రభాకర్ కు ప్రభుత్వం తెచ్చిన జీఓ 14 సంబంధించి బహిరంగ వినతిపత్రాన్ని విడుదల చేశారు. 

*(1)*: కేసీఆర్ సాధికారత – కాంగ్రెస్ అణచివేత: కేసీఆర్ బీసీలకు ఆత్మగౌరవం, స్వయంపాలన కల్పిస్తే... కాంగ్రెస్ ప్రభుత్వం పాశవిక దాడితో వారి హక్కులను కాలరాస్తోంది: ఎమ్మెల్సీ దాసోజు శ్రవణ్ మండిపాటు 

*(2)*: బీసీ వ్యతిరేక, ఆధిపత్య అహంకార  జీవో 14ను తక్షణమే రద్దు చేయాలి: బీసీ సంక్షేమ శాఖ మంత్రి పొన్నం ప్రభాకర్‌కు ఎమ్మెల్సీ దాసోజు శ్రవణ్ సంచలన లేఖ 

*(3)*: ఆత్మగౌరవ భవనాలు: కేసీఆర్ ఇచ్చిన ఆత్మగౌరవ భవనాలపై కాంగ్రెస్ సర్కారు పెత్తనం ఏంటి?: ఎమ్మెల్సీ దాసోజు శ్రవణ్ నిలదీత 

*(4)*: నిర్వహణ హక్కులు: కేసీఆర్ హయాంలో కుల ట్రస్టులకే ఇచ్చిన నిర్మాణ, నిర్వహణ హక్కులను కాంగ్రెస్ ప్రభుత్వం ఎందుకు లాక్కుంటోంది?: దాసోజు ప్రశ్న 

*(5)*: కాపలాదారులా?: కేసీఆర్ బీసీలను యజమానులను చేస్తే... కాంగ్రెస్ తెచ్చిన జీవో 14 వారిని సొంత భవనాల్లో కేవలం కాపలాదారులుగా మార్చింది: దాసోజు తీవ్ర ఆగ్రహం 

*(6)*: దొరల పాలన: కేసీఆర్ బీసీలకు స్వయం సాధికారత ఇస్తే... కాంగ్రెస్ ప్రభుత్వం గడీల దొరల తరహా నిరంకుశ డిక్టేషన్ అమలు చేస్తోంది: దాసోజు ధ్వజం 

*(7)*: ఎన్నికలు ఏవి?: కమిటీలకు ఎన్నికలు లేకుండా మంత్రి నామినేషన్లతో నింపడం ప్రజాస్వామ్య విరుద్ధం: దాసోజు శ్రవణ్ 

*(8)*:  ఖర్చులు వారివి – పెత్తనం మీదా?: కరెంటు బిల్లులు, పన్నులు బీసీలవి... పెత్తనం, అజమాయిషీ మాత్రం కాంగ్రెస్ సర్కారుదా?: తీవ్రంగా మండిపడ్డ దాసోజు 

*(9)*: సొంత నిధులపైనా ఆంక్షలా?: ప్రజలు చందాలతో, సొంత ఖర్చులతో కట్టుకున్న భవనాలపైనా ప్రభుత్వ ఆధిపత్యమా?: దాసోజు ఫైర్ 

*(10)*:  రాజకీయ సమావేశాలపై బ్యాన్: బీసీల సొంత భవనాల్లో హక్కుల గురించి మాట్లాడకూడదా?... ఈ ఆంక్షలు రాజ్యాంగ విరుద్ధం కాదా?: ఎమ్మెల్సీ దాసోజు 

*(11)*: ఐక్యతకు గండి: అన్ని బీసీ కులాలు కలిసి ఉమ్మడి సదస్సులు నిర్వహించుకోకుండా అడ్డుకుంటున్న జీవో 14: దాసోజు ఆరోపణ

 

*(12)*: నిధుల లెక్కలేవి?: కేసీఆర్ హయాంలో 41 భవనాలకు మంజూరైన ₹95.25 కోట్లలో కాంగ్రెస్ విడుదల చేసింది ఎంత?... నిర్మాణాలు ఎందుకు పూర్తి కాలేదు?: దాసోజు డిమాండ్ 

*(13)*: న్యాయపోరాటం తప్పదు: బీసీల ఆత్మగౌరవాన్ని దెబ్బతీసే జీవో 14ను ఉపసంహరించుకోకపోతే హైకోర్టును ఆశ్రయిస్తాం: ప్రభుత్వానికి ఎమ్మెల్సీ డా. దాసోజు శ్రవణ్ హెచ్చరిక

తెలంగాణ సంస్కృతి, సంప్రదాయాలు, పశుసంపద వైభవానికి ప్రతీకగా నిలిచే హైదరాబాద్ సదర్ ఉత్సవాలు_

*హైదరాబాద్ సదర్ ఉత్సవాలు యాదవుల ఆత్మగౌరవానికి, ఐక్యతకు ప్రధాన సాంస్కృతిక వేడుక - సీఎం రేవంత్ రెడ్డి*

బాపట్ల కృష్ణమోహన్, మీడియా టుడే, నవంబర్ 04:

హైదరాబాద్ సదర్ ఉత్సవాల సందర్భంగా ముఖ్యమంత్రి ఎ. రేవంత్ రెడ్డి యాదవ సోదర, సోదరీమణులందరికీ హృదయపూర్వక శుభాకాంక్షలు తెలిపారు. తెలంగాణ సంస్కృతి, సంప్రదాయాలు, పశుసంపద వైభవానికి ప్రతీకగా నిలిచే హైదరాబాద్ సదర్ ఉత్సవాలు యాదవుల ఆత్మగౌరవానికి, ఐక్యతకు, వారసత్వ గొప్పతనానికి ప్రతిబింబమని పేర్కొన్నారు.ప్రత్యేకంగా అలంకరించిన దున్నపోతుల ప్రదర్శనలు, వాటి ఠీవి, దర్పం, సందడి సదర్ ఉత్సవాలకు ప్రత్యేక ఆకర్షణగా నిలుస్తాయని అన్నారు. ఈ ఉత్సవాలు యాదవుల జీవన వైభవాన్ని చాటి చెబుతాయన్నారు. ఈ సదర్ ఉత్సవాలు ప్రతి యాదవ కుటుంబంలో ఆనందోత్సాహాలు నింపాలని, అందరికీ సిరిసంపదలు, ఆయురారోగ్యాలు కలగాలని, యాదవుల ఐక్యత, అభ్యున్నతి మరింత బలోపేతం కావాలని ముఖ్యమంత్రి ఆకాంక్షించారు.

రామంతాపూర్ వెంకట్ రెడ్డి నగర్ అర్బన్ ప్రైమరీ హెల్త్ సెంటర్ లో సమస్యలు_

*రామంతాపూర్ వెంకట్ రెడ్డి నగర్ అర్బన్ ప్రైమరీ హెల్త్ సెంటర్ లో సమస్యలు*

*పేద ప్రజలకు ప్రాథమిక ఆరోగ్య సంరక్షణ అందించడంలో అధికారులు,పాలకులు బాధ్యత మరిచారు*

బాపట్ల కృష్ణమోహన్, మీడియా టుడే,నవంబర్ 04:

మేడ్చల్ మల్కాజ్గిరి మున్సిపల్ కార్పొరేషన్ ఉప్పల్ సర్కిల్ రామంతపూర్ నందుగల అర్బన్ ప్రైమరీ హెల్త్ సెంటర్ ను ప్రజావాణి స్వచ్చంద సంస్థ ప్రతినిధుల బృందం పరిశీలనకు వెళ్లారు .ఈ సందర్భంగా వారు మాట్లాడుతూ ఈ హాస్పిటల్ నందు తిష్ట వేసుకున్న సమస్యలపై రెండు సంవత్సరముల క్రితమే అధికారులకు విజ్ఞప్తి చేసినప్పటికీ ప్రయోజనం లేకుండా పోయింది  .ఈరోజుకి కూడా సమస్యలు అలాగే ఉన్నాయి .హాస్పిటల్ నందు- రోగులకు వైద్య నిమిత్తం పది పడకలు, పరీక్షలు చేయుటకు ల్యాబ్ కూడా ఉన్నది .ఆరు నెలల క్రితం ల్యాబ్ ఇంచార్జ్ ట్రాన్స్ఫర్ కావడంతో ల్యాబ్ నందు పరీక్షలు ఆగిపోయాయి, డ్రైనేజీ వ్యవస్థ కుంటుబడిపోయింది, భవనం పై కప్పు చెత్తాచెదారంతో నిండిపోయి వర్షం వచ్చినప్పుడు నీరు నిలిచి అట్టినీరు గదుల్లోకి చేరుకొని స్లాబ్ పాడైపోయింది.ఫాల్ సీలింగ్ ఎక్కడికి అక్కడ విరిగిపోయింది .రూములో నందు నీరు నిలిచి పోవడం వల్ల హాస్పిటల్కు సరియైన రూములు లేకపోవడం వల్ల అధికారులు ఇబ్బందులు పడుతున్నారు .హాస్పిటల్ పైకి వెళ్లడానికి మెట్లు కూడా ఏర్పాటు చేయలేదు .హాస్పిటల్ పైకప్పు పై చెట్లు నిలిచి స్లాబ్ అంతా పాడైపోయింది. రోగులకు త్రాగడానికి మంచినీటి సౌకర్యం కూడా లేకుండా పోయింది. ఇంత మంచి హాస్పిటల్ ప్రజల కోసం ఏర్పాటు చేసి వాటి పర్యవేక్షణను మరిచారు .అసలు డాక్టర్లు సమయానికి వస్తున్నారా లేదా ?ఈ హాస్పిటల్ పై ఏ అధికారులు పర్యవేక్షిస్తారు? అధికారులు నిద్రపోయారే అనుకుందాం కానీ ప్రజల జీవితాలను బాగు చేస్తామని ఓట్లు వేయించుకొని అధికారంలోకి వచ్చిన పాలకులు ఏం చేస్తున్నారు? ప్రజావాణి స్వచ్ఛంద సంస్థ ప్రశ్నలకు సమాధానం ఎవరు చెప్తారు.? అంటూ అధికారులపై ఆగ్రహం వ్యక్తం చేశారు .ఇప్పటికైనా అధికారులు పాలకుల సమన్వయంతో సమస్యలను వెంటనే బాగు చేసి రోగులకు ఇబ్బంది కలగకుండా చూడాలని ప్రజావాణి స్వచ్ఛంద సంస్థ విజ్ఞప్తి చేస్తుంది.ఈ కార్యక్రమంలో ఎర్రం శ్రీనివాస్, గోసుల విజయ్ కుమార్, తెడ్డు రవీందర్,వంపు లక్ష్మయ్య పాల్గొన్నారు.

విధి నిర్వహణలో మానవీయ కోణం.. పసిబిడ్డకు అండగా ఖాకీ!_

*విధి నిర్వహణలో మానవీయ కోణం.. పసిబిడ్డకు అండగా ఖాకీ!*

బాపట్ల కృష్ణమోహన్, మీడియా టుడే, నవంబర్ 03:

పోలీసు విధుల్లో బాధ్యతతో పాటు మానవత్వాన్ని చాటుకున్నారు మల్కాజిగిరి పోలీస్ కమిషనరేట్ పరిధిలోని చైతన్యపురి పోలీస్ స్టేషన్ మహిళా కోర్టు కానిస్టేబుల్ దీప.

ఎల్.బి. నగర్ స్పెషల్ పోక్సో కోర్టుకు చంటి బిడ్డతో విచారణకు హాజరైన బాధితురాలు ఇబ్బంది పడకుండా, విచారణ సమయంలో ఆ పసికందును తన చేతుల్లోకి తీసుకుని తల్లిలా ఆలనా పాలనా చూశారు. ఖాకీలో మాతృత్వం, మానవీయతను చాటిన దీపను న్యాయవాదులు, పోలీసు సిబ్బంది అభినందించారు.

సామాజిక కార్యకర్త కప్పల రమేష్ చేస్తున్న నిరంతర పోరాటానికి తొలి విజయం_

*పత్రికా ప్రకటన*

*సామాజిక కార్యకర్త కప్పల రమేష్ చేస్తున్న నిరంతర పోరాటానికి తొలి విజయం*

*నిరుద్యోగులు, కాంట్రాక్ట్/ఔట్ సోర్సింగ్, పార్ట్ టైం ఉద్యోగుల సమస్యపై సామాన్యుడి పోరాటానికి కేంద్రం స్పందన - లేబర్ కమిషన్ నుండి కీలక లేఖ*

బాపట్ల కృష్ణమోహన్, మీడియా టుడే, నవంబర్ 03:

దేశంలో లక్షలాది మంది నిరుద్యోగులు, కాంట్రాక్ట్ మరియు ఔట్ సోర్సింగ్ ఉద్యోగులు ఎదుర్కొంటున్న అన్యాయంపై తెలంగాణ రాష్ట్రం, నల్గొండ జిల్లా, శాలిగౌరారం మండలం, ఉట్కూర్ గ్రామానికి చెందిన సామాజిక కార్యకర్త *కప్పల రమేష్* చేస్తున్న నిరంతర పోరాటానికి తొలి విజయం లభించింది.

*విషయం ఏమిటి?*

రాష్ట్ర ప్రభుత్వాల్లో 8-10 సంవత్సరాలుగా శాంక్షన్డ్ పోస్టుల్లో పనిచేస్తున్న కాంట్రాక్ట్/ఔట్ సోర్సింగ్ ఉద్యోగులకు తక్కువ జీతం ఇచ్చి, ఉద్యోగ భద్రత లేకుండా దోపిడీ చేస్తున్నారని, సుప్రీంకోర్టు ఇచ్చిన *సమాన పనికి సమాన వేతనం Equal Pay for Equal Work  తీర్పును అమలు చేయాలని, దీనికోసం ఒక *జాతీయ విధానం National Policy తీసుకురావాలని కోరుతూ నేను గత *12.09.2026న* భారత ప్రభుత్వ కార్మిక మంత్రిత్వ శాఖకు వినతిపత్రం సమర్పించాను.ఈ వినతిపత్రంలో సుప్రీంకోర్టు సంచలన తీర్పు *భోళా నాథ్ వర్సెస్ స్టేట్ అఫ్ జార్ఖండ్ 30.01.2026, 2026 INSC 99* ను ఉటంకిస్తూ, 10 సంవత్సరాలు పనిచేసిన కాంట్రాక్ట్ ఉద్యోగులను క్రమబద్ధీకరించాలన్న ఆదేశాలను అమలు చేయాలని కోరాను. లేబర్ కమిషన్ తో పాటు నేషనల్ హ్యూమన్ రైట్స్ కమిషన్కు మరియు పీ.ఎం.ఓ ప్రధానమంత్రి కార్యాలయానికి కూడా వినతి సమర్పించడం జరిగింది. ఇట్టి కేసు నేషనల్ హ్యూమన్ రైట్స్ కమిషన్   ఎన్. హెచ్. ఆర్సీ లో రిజిస్టర్ అయినది NHRC డైరీ నెంబర్ .110806/CR/2026.

*కేంద్రం స్పందన:*

నా వినతిని పరిశీలించిన *భారత ప్రభుత్వ చీఫ్ లేబర్ కమిషనర్ కార్యాలయం, న్యూఢిల్లీ* వెంటనే స్పందించింది.

*File No. 31(05)2026-OSH (e-203177), Date: 02.11.2026* ద్వారా *Regional Labour Commissioner (C), శ్రీ హరి ప్రసాద్ చౌరాసియా* గారు నా వినతిపత్రాన్ని *LRC Section (Labour Reforms Cell), Ministry of Labour & Employment, Rafi Marg, New Delhi* కి "తగు చర్యలు తీసుకోవాలని" కోరుతూ అధికారికంగా పంపించారు. దీని కాపీని నాకు కూడా పంపించారు.

ఒక సాధారణ గ్రామానికి చెందిన వ్యక్తి పెట్టిన వినతిని కేంద్ర కార్మిక శాఖ ఇంత త్వరగా పరిగణనలోకి తీసుకొని పాలసీ విభాగానికి పంపడం హర్షణీయం.

*కప్పల రమేష్   డిమాండ్లు:*

*(1)*:  కేంద్ర, రాష్ట్ర ప్రభుత్వాల్లో ఉన్న లక్షలాది ఖాళీ శాంక్షన్డ్ పోస్టులను వెంటనే భర్తీ చేయాలి.

*(2)*:  సుప్రీంకోర్టు తీర్పు ప్రకారం 10 సంవత్సరాలు దాటిన కాంట్రాక్ట్/ఔట్ సోర్సింగ్ ఉద్యోగులందరినీ క్రమబద్ధీకరించాలి.

*(3)*:  "సమాన పనికి సమాన వేతనం" సూత్రాన్ని కఠినంగా అమలు చేయాలి, కాంట్రాక్ట్ దోపిడీని అంతం చేయాలి.

*(4)*:  దేశవ్యాప్తంగా ఒకే విధమైన జాతీయ కాంట్రాక్ట్ విధానాన్ని తీసుకురావాలి.

*(5)*: కేంద్ర రాష్ట్ర ప్రభుత్వాలు కాంట్రాక్ట్ లేదా అవుట్సోర్సింగ్ పార్టీ విధానంలో నియామకాలు చేపట్టే కాంట్రాక్ట్ నియమావళిని, కేంద్ర స్థాయిలో సెంట్రల్ లేబర్ కమిషన్ నుండి మరియు రాష్ట్రస్థాయిలో స్టేట్ లేబర్ కమిషన్ నుండి అనుమతితో కాంట్రాక్ట్ విధానాన్ని రూపొందించాలి.

*(6)*: కాంట్రాక్ట్ ఔట్సోర్సింగ్ మరియు పార్ట్ టైం వివిధ రకాల ఉద్యోగాలలో పనిచేస్తున్న ఉద్యోగులందరికీ కేంద్ర స్థాయిలో కేంద్ర లేబర్ కమిషన్ బ్యాంక్ అకౌంట్ ద్వారా  మరియు రాష్ట్రస్థాయిలో రాష్ట్ర లేబర్ కమిషన్ బ్యాంక్ ఎకౌంట్ ద్వారా ఉద్యోగుల బ్యాంక్ అకౌంట్లో జీతాలు అందించాలి.

ఈ విషయంలో కేంద్ర కార్మిక శాఖ త్వరలోనే సానుకూల నిర్ణయం తీసుకుంటుందని ఆశిస్తున్నాను. దేశంలోని నిరుద్యోగులు, కాంట్రాక్ట్ ఉద్యోగులు అందరూ ఈ ప్రయత్నానికి మద్దతు ఇవ్వాలని కోరుతున్నాను.

    *ఇట్లు,*

*కప్పల రమేష్*

*సామాజిక కార్యకర్త, ఉట్కూర్ గ్రామం,

శాలిగౌరారం మండలం

*నల్గొండ జిల్లా, తెలంగాణ - 508210*

టామ్కామ్ TOMCOM బాధితులకు న్యాయం జరగాలి - మానవ హక్కుల వేదిక HRF డిమాండ్_

*పత్రికా ప్రకటన*

*టామ్కామ్ TOMCOM బాధితులకు న్యాయం జరగాలి - మానవ హక్కుల వేదిక డిమాండ్*

బాపట్ల కృష్ణమోహన్, మీడియా టుడే, నవంబర్ 02:

విదేశాలలో ఉద్యోగాల పేరిట జరుగుతున్న మోసాలను అరికట్టాల్సిన ప్రభుత్వరంగ సంస్థే అభ్యర్థులను మోసగిస్తున్న వైనంపై 'మానవ హక్కుల వేదిక' HRF ఆందోళన వ్యక్తం చేసింది. తెలంగాణ ప్రభుత్వరంగ సంస్థ అయిన TOMCOM,తెలంగాణ ఓవర్సీస్ మ్యాన్‌పవర్ కంపెనీ లిమిటెడ్ ద్వారా జరుగుతున్న అవకతవకలపై నిజనిర్ధారణ చేపట్టిన వేదిక, అక్టోబర్ 31న బాధితుల నుంచి పూర్తి వివరాలు సేకరించింది.మొదట మెకట్రోనిక్స్, ఎలక్ట్రానిక్స్ వంటి రంగాలలో జర్మనీలో ఉద్యోగాలు ఉన్నాయని TOMCOM ఒక ఆకర్షణీయమైన కరపత్రాన్ని విడుదల చేసింది. ప్రభుత్వ సంస్థ అనే నమ్మకంతో అభ్యర్థులు సంప్రదించగా, ఉత్తరప్రత్యుర్తరాలన్నీ TOMCOM ద్వారానే జరిగాయి. అంతకుముందు బ్యాచ్ వారు అందరు జర్మనీ లో ఉద్యోగాలు పొందారు అని చెప్పారు . కచ్చితంగా ఉద్యోగం వస్తుంది అన్న నమ్మకంతో అభ్యర్థులు  జాయిన్ అయ్యారు .  కానీ, తీరా జర్మనీ భాషా కోచింగ్ మొదలయ్యే సమయానికి ఉత్తరప్రదేశ్‌కు చెందిన ఫెయిర్‌స్ట్రీట్ ఇండియా లిమిటెడ్  అనే ప్రైవేట్ సంస్థను రంగంలోకి దించారు. ట్రైనింగ్ మొదలైన రెండు వారాల తర్వాత అభ్యర్థులతో ఫెయిర్‌స్ట్రీట్ అగ్రిమెంట్ ఫారం మీద సంతకాలు చేయించుకున్నారు. ఈ ఒప్పందం ప్రకారం రూ. 4,10,400 ఫీజును ఫెయిర్‌స్ట్రీట్‌కు ఇవ్వాలని, అడ్మిషన్ లెటర్ కూడా ఆ ప్రైవేట్ సంస్థే జారీ చేసిందని తేలింది.ఇన్ని లక్షలు చెల్లించినా నాణ్యమైన శిక్షణ ఇవ్వకపోవడంతో చాలా మంది విద్యార్థులు పరీక్షలో పాస్ కాలేకపోయారు. ఒకవేళ పాసయిన వారికి ఎలక్ట్రానిక్స్ రంగంలో ఉద్యోగాలు ఇప్పిస్తామన్న హామీకి విరుద్ధంగా.. జర్మనీలో చెత్త సేకరణ, జంతు వధశాలల వంటి పనులకు వెళ్లాలని సంస్థ చెప్పడం దారుణం. దీనిపై ప్రశ్నిస్తే TOMCOM నుండి సరైన స్పందన కరువైంది.

ప్రభుత్వ రంగ సంస్థ ఇస్తున్న ప్రకటనలను నమ్మి యువకులు మోసపోతున్నారు. ఒక ప్రభుత్వ సంస్థ ప్రైవేట్ ఏజెన్సీని భాగస్వామిగా పెట్టుకున్నప్పటికీ, అగ్రిమెంట్లు అన్నీ ప్రభుత్వ సంస్థ TOMCOM పేరు మీదే జరగాలి కానీ, ప్రైవేట్ సంస్థతో కాకూడదు. చైర్మన్‌గా కార్మిక శాఖా మంత్రి ఉన్న ఈ సంస్థపై ప్రజల నమ్మకం వమ్ము కాకూడదు. ఇప్పటికే ఈ మోసం వల్ల కొద్దిమంది యువకులు తమ అమూల్యమైన 2 సంవత్సరాలను కోల్పోయారు.

**మానవ హక్కుల వేదిక డిమాండ్లు:**

*(1)*: TOMCOM బాధితులందరికీ తగిన న్యాయం చేయాలి.

*(2)*: అభ్యర్థులతో చేసుకునే ఒప్పందాలన్నీ నేరుగా TOMCOM పేరు మీదే జరగాలి.

*(3)*: కరపత్రాలలో ప్రకటించిన విధంగానే నాణ్యమైన ఉద్యోగ అవకాశాలు కల్పించాలి.

*(4)*: ఈ మొత్తం వ్యవహారంపై సంస్థ చైర్మన్, కార్మిక శాఖ మంత్రి స్పందించి బాధ్యులపై చర్యలు తీసుకోవాలి.

*(5)*: TOMCOM తన పారదర్శకతను నిరూపించుకుంటూ, ఇతర ప్రైవేట్ సంస్థలతో కుదుర్చుకున్న ఒప్పందాల వివరాలను, అలాగే ఏ బ్యాచ్ లో ఎంతమంది ఉన్నారు ,  వారిలో ఎంతమందికి ఉద్యోగాలు వచ్చాయి అన్న వివరాలు  అధికారిక వెబ్‌సైట్‌లో ఉంచాలి.

HMWSSB 37వ ఆవిర్భావ దినోత్సవం సందర్భంగా ముఖ్యమంత్రి రేవంత్ రెడ్డి శుభాకాంక్షలు తెలిపారు_

*హైదరాబాద్ మెట్రోపాలిటన్ వాటర్ సప్లై అండ్ సీవరేజ్ బోర్డ్ HMWSSB 37వ ఆవిర్భావ దినోత్సవం సందర్భంగా ముఖ్యమంత్రి రేవంత్ రెడ్డి శుభాకాంక్షలు తెలిపారు*

బాపట్ల కృష్ణమోహన్, మీడియా టుడే, నవంబర్ 01:

హైదరాబాద్ మెట్రోపాలిటన్ వాటర్ సప్లై అండ్ సీవరేజ్ బోర్డ్ HMWSSB 37వ ఆవిర్భావ దినోత్సవం సందర్భంగా గౌరవనీయ ముఖ్యమంత్రి రేవంత్ రెడ్డి అధికారులు, ఉద్యోగులు మరియు వారి కుటుంబాలకు హృదయపూర్వక శుభాకాంక్షలు తెలిపారు.గత 37 సంవత్సరాలుగా హైదరాబాద్ ప్రజలకు సురక్షితమైన తాగునీటిని అందించడంతో పాటు, మురుగునీటి నిర్వహణ సేవలను కల్పించడంలో HMWSSB కీలక పాత్ర పోషించిందని పేర్కొన్నారు. నగర అభివృద్ధి, ప్రజారోగ్యం, సమగ్ర ప్రగతికి బోర్డు అందించిన విశేష సేవలను ఈ సందర్భంగా ముఖ్యమంత్రి అభినందించారు.

హైదరాబాద్ నగరం నిరంతరం విస్తరిస్తున్న నేపథ్యంలో నీటి భద్రతకు, విలువైన జల వనరుల సుస్థిర నిర్వహణకు అత్యంత ప్రాధాన్యత ఇవ్వాలని చెప్పారు. ఎల్‌నినో ప్రభావం, ఉత్పన్నమవుతున్న  పరిస్థితులను దృష్టిలో ఉంచుకుని, మంచినీటి వనరులను పరిరక్షించేందుకు, గృహావసరాలకు సంబంధం లేని ఇతర అవసరాల కోసం మంచినీటి వినియోగాన్ని తగ్గించేందుకు ముందస్తు చర్యలు చేపట్టాల్సిన అవసరం ఉందని సూచించారు.ఈ రోజు నుంచి ‘డయల్ గ్రీన్ ట్యాంకర్ – గ్రీన్ ట్యాంకర్ ఆపరేషన్స్’ కార్యక్రమాన్ని ప్రారంభించడాన్ని ముఖ్యమంత్రి అభినందిస్తూ, సుస్థిర నీటి నిర్వహణ దిశగా ఇది సరైన సమయంలో చేపట్టిన కీలకమైన కార్యక్రమమని అభివర్ణించారు.ఈ కార్యక్రమాన్ని ప్రారంభించినందుకు మేనేజింగ్ డైరెక్టర్ కె. అశోక్ రెడ్డిను ఆయన అభినందించారు.HMWSSBకి అభినందనలు తెలియజేస్తూ, ప్రభుత్వ శాఖలు, పరిశ్రమలు, నిర్మాణ సంస్థలు, వాణిజ్య సంస్థలు తమ తోటల పెంపకం, నిర్మాణ పనులు, పారిశ్రామిక అవసరాల కోసం శుద్ధి చేసిన మురుగునీటిని Treated Wastewater మరింత విస్తృతంగా వినియోగించాలని కోరారు. దీనివల్ల మంచినీటిపై ఆధారపడటం తగ్గడంతో పాటు, అత్యవసర గృహావసరాలకు మంచినీరు అందుబాటులో ఉండేలా చూడవచ్చని పేర్కొన్నారు.నీటి సంరక్షణను సమిష్టి బాధ్యతగా స్వీకరించాలని, సుస్థిరమైన, నీటి భద్రత కలిగిన హైదరాబాద్ నిర్మాణంలో భాగస్వాములై ప్రతి ఒక్కరూ తమ వంతు సహకారం అందించాలని ఈ సందర్భంగా  ముఖ్యమంత్రి గారు ప్రజలకు, సంబంధిత భాగస్వాములందరికీ పిలుపునిచ్చారు.కోర్ అర్బన్ రీజియన్ CURE ప్రజలకు సేవలందించే లక్ష్యంతో HMWSSB తన ప్రస్థానంలో మరిన్ని విజయాలు సాధించాలని ఆకాంక్షించారు.