తెలంగాణ ఈగల్ EAGLE బృందానికి ఉత్తమ ANTF అవార్డు_

*ఇటీవల న్యూఢిల్లీలో జరిగిన 3వ జాతీయ యాంటీ నార్కోటిక్స్ టాస్క్ ఫోర్స్ ANTF అధిపతుల సదస్సులో ఉత్తమ ANTF అవార్డు అందుకున్న ఈగల్ EAGLE బృందాన్ని తెలంగాణ డీజీపీ శ్రీ సి.వీ. ఆనంద్, ఐపీఎస్, సన్మానించారు.*

బాపట్ల కృష్ణమోహన్, మీడియా టుడే, సెప్టెంబర్ 26:

అరెస్టులు, ఆస్తుల స్వాధీనం, అంతర్జాతీయ దర్యాప్తులు, డార్క్ వెబ్ విశ్లేషణ, భారీ మొత్తంలో మాదకద్రవ్యాల స్వాధీనం వంటి ఆరు కీలక ప్రమాణాల్లో ఈగల్ బృందం అత్యుత్తమ ప్రతిభ కనబరిచిందని తెలంగాణ డీజీపీ  సి.వీ. ఆనంద్, ఐపీఎస్ పేర్కొన్నారు.మాదకద్రవ్యాల కేసుల్లో ఈగల్ బృందం ఒక్కో కేసుకు సగటున 3.7 అరెస్టులు సాధించిందని, ఇది జాతీయ సగటు 1.3తో పోలిస్తే దాదాపు మూడు రెట్లు ఎక్కువని ఆయన వెల్లడించారు. అలాగే 500 కిలోలకు పైగా మాదకద్రవ్యాలకు సంబంధించిన 15కు పైగా కేసులు నమోదు చేసినట్లు తెలిపారు.ఇదే స్ఫూర్తితో పనితీరును కొనసాగిస్తూ, మిగిలిన విభాగాల్లోనూ మరింత మెరుగైన ఫలితాలు సాధించాలని డీజీపీ బృందాన్ని ప్రోత్సహించారు. అక్రమంగా నిర్వహిస్తున్న మాదకద్రవ్యాల తయారీ కేంద్రాలు, డార్క్ వెబ్ ఆధారిత డ్రగ్ డీల్స్‌పై నిఘాను మరింత ముమ్మరం చేస్తామని తెలిపారు.మాదకద్రవ్యాలపై పోరాటాన్ని మరింత బలోపేతం చేసేందుకు మానవ వనరులు, సాంకేతిక పరిజ్ఞానం పరంగా ఈగల్ బృందానికి పూర్తి సహకారం అందిస్తామని సి.వీ. ఆనంద్, ఐపీఎస్, హామీ ఇచ్చారు.