*రైతు పంటను కాపాడాల్సిన వ్యవస్థే కబ్జాదారులకు అండగా నిలిస్తే రైతు ఎక్కడికి వెళ్లాలి?*
*"రైతు పొలాన్ని దున్నింది ట్రాక్టర్ కాదు... వ్యవస్థపై ప్రజల విశ్వాసాన్ని దున్నేసిన అన్యాయం!"*
*"ఖాకీ న్యాయానికి ప్రతీకగా నిలవాలి... కబ్జా రాజకీయాలకు కాపలాదారుగా కాదు!"*
బాపట్ల కృష్ణమోహన్, మీడియా టుడే, ఆగస్టు 07:
నల్లగొండ జిల్లా శాలిగౌరారం మండలంలో చట్టాన్ని అమలు చేయాల్సిన అధికార వ్యవస్థపై ప్రజల్లో తీవ్రమైన అనుమానాలు వ్యక్తమవుతున్నాయి. రైతు చెమటోడ్చి సాగు చేసిన పత్తి పంటను రాత్రివేళ దున్నివేసిన ఘటనపై సమగ్ర విచారణ జరిపి బాధ్యులపై కఠిన చర్యలు తీసుకోవాలని డిమాండ్ చేస్తున్న పౌరసమాజం.చిన్న చిన్న వివాదాలను అడ్డం పెట్టుకుని అక్రమ పట్టాలు పొందిన వ్యక్తులపై చర్యలు తీసుకోవాల్సిన బాధ్యత కలిగిన అధికారులు, వారికే అండగా నిలుస్తున్నారనే ఆరోపణలు వినిపిస్తున్నాయి. అక్రమ పట్టాల వ్యవహారంపై ఫిర్యాదులు ఉన్నప్పటికీ సంబంధిత వ్యక్తి అయిన కప్పల శ్రీనివాస్ పై కేసు నమోదు చేయకుండా వ్యవహరించడమే కాకుండా, అధికార యంత్రాంగం ఏకపక్షంగా వ్యవహరిస్తోందనే సందేహాలు ప్రజల్లో బలపడుతున్నాయి.
ఈ వ్యవహారంలో శాలిగౌరారం ఎస్సై సైదులు పాత్రపై కూడా తీవ్రమైన ఆరోపణలు వస్తున్నాయి. రైతు కుటుంబానికి అన్యాయం జరిగిందనే ఆరోపణలతో పాటు, అధికార దుర్వినియోగం జరిగిందా? అక్రమ పట్టాలు పొందిన వ్యక్తులతో కుమ్మక్కు జరిగిందా? అనే అంశాలపై స్వతంత్రంగా, నిష్పక్షపాతంగా విచారణ జరగాల్సిన అవసరం ఉంది. అలాగే రైతు కుటుంబాన్ని బెదిరించే కుట్ర జరిగిందనే ఆరోపణలు కూడా వెలుగులోకి వచ్చిన నేపథ్యంలో వాటిపైనా సమగ్ర దర్యాప్తు జరగాలి. ప్రజలకు రక్షణ కల్పించాల్సిన పోలీసులు అధికార బలంతో కబ్జాదారులకు రక్షణగా మారితే ప్రజాస్వామ్యం ప్రమాదంలో పడుతుంది. చట్టం ధనవంతులకు ఒకలా, పేద రైతులకు మరోలా ఉండకూడదు. ఖాకీ యూనిఫాం న్యాయానికి ప్రతీక కావాలి తప్ప, భూ కబ్జాదారులకు కవచంగా మారకూడదు.ఈ ఘటనపై జిల్లా ఎస్పీ, ఉన్నత పోలీసు అధికారులు మరియు రాష్ట్ర ప్రభుత్వం వెంటనే జోక్యం చేసుకుని స్వతంత్ర విచారణకు ఆదేశాలు ఇవ్వాలి. రైతుకు జరిగిన నష్టాన్ని అంచనా వేసి న్యాయం చేయడంతో పాటు, తప్పు చేసిన వారు ఎవరైనా చట్టం ముందు నిలబెట్టాలని ప్రజలు డిమాండ్ చేస్తున్నారు.
No comments:
Post a Comment