నకిలీ పత్రాలు సృష్టించుకో..అనుమతులు ఇస్తా..

( అక్రమార్కులకు నిస్సిగ్గుగా వంత పాడుతున్న అమీన్ పూర్ మున్సిపల్ కమిషనర్ సుజాత.. )

- అమీన్ పూర్ మున్సిపల్ కేంద్రంగా సాగుతున్న అక్రమ నిర్మాణాలు..
- అమ్యామ్యాలు ఇస్తే చాలు అధికారులు ఆ వైపు చూడరు.. 
- జిల్లా రెవిన్యూ అధికారి కస్టడీలో ఉండాల్సిన భూములు కనుమరుగు.. 
- ఏ.ఆర్ డెవలపర్స్ పేరుతో పాగా వేస్తున్న వైనం..  
- వక్ర మార్గంలో నిర్మాణ అనుమతులు..
- అక్రమార్జనే ద్యేయంగా మున్సిపల్ కమిషనర్ సుజాత..   
 - బోగస్ పత్రాలతో  తెరపైకి వస్తున్న అక్రమ వెంచర్లు..
- ప్రభుత్వ ఖజానాకు భారీ గా గండి..  
-  గ్రామ పంచాయితీ అనుమతులతో యథేచ్ఛగా అక్రమ కట్టడాలు..   
-  రెవిన్యూ అధికారుల అధీనంలో ఉన్న భూమి మాయం..         
- సర్వే నెంబర్ 1003,1004,1057,1060,1062,1063 లలో 
   అక్రమ నిర్మాణాలతో పేట్రేగిపోతున్న నిర్మాణ సంస్థ.. 
- కాసులకు కక్కుర్తి పడి సర్కారీ భూమిలో నిర్మాణ అనుమతులు 
   ఇచ్చిన అధికారులు 
- గడప దాటని సీడీఎంఏ డైరెక్టర్ ఎన్. సత్యనారాయణ.. 
 
ఒక అవినీతి అధికారిణి నిస్సిగ్గుగా నకిలీ పత్రాలు సృష్టించిన నిర్మాణ సంస్థలకు, లంచాలు అందుకుంటూ అడ్డగోలుగా అనుమతులు జారీ చేస్తుంటే.. వాటిని నిలువరించి చర్యలు తీసుకోవాల్సిన కమిషనర్, డైరెక్టర్ మున్సిపల్ అడ్మినిస్ట్రేషన్ ఎన్ . సత్యనారాయణ కూడా అవినీతి ఆఫీసర్ సుజాతకు వత్తాసు పలుకుతూ..  తాను కూడా ఆమె పాపంలో పాలుపంచుకోవడం ఎంతో దుర్మార్గం.. ఇటు ప్రభుత్వాన్ని, అటు ప్రజలను మోసం చేస్తూ అక్రమ సంపాదనకు అలవాటు పడి తాము విధులు నిర్వహిస్తున్న స్థాయికి కళంకం అంటగడుతున్నారు.. ఇలాంటి అవినీతిపరులైన అధికారుల వలన ప్రభుత్వానికి, సంబంధిత శాఖా మంత్రి కేటీఆర్ కు చెడ్డపేరు వస్తోంది.. ఇలాంటి అక్రమ వ్యవహారాలపై మంత్రి కేటీఆర్ దృష్టి పెట్టాలని అమీన్ పూర్ స్థానికులు కోరుతున్నారు.. 
 
హైదరాబాద్, 04 సెప్టెంబర్ (ఆదాబ్ హైదరాబాద్) : 
సంగారెడ్డి జిల్లాలోని, అమీన్ పూర్ మున్సిపాల్టీలో ఏ.ఆర్. డెవలపర్స్ అనే నిర్మాణ సంస్థ నకిలీ పత్రాలు సృష్టించి కబ్జాలకు తెరలేపింది.. సదరు నిర్మాణ సంస్థ చూపించిన సర్వే నెంబర్ల భూమి ఏ.ఆర్. డెవలపర్స్ భూమి కాదని, రెవిన్యూ అధికారులు గతంలోనే ఇచ్చిన రిపోర్ట్ ద్వారా తేట తెల్లమవుతుంది.. సర్వే నెంబర్స్  1003,1004,1057,1060,1062,1063 లకు సంబంధించిన భూములలో వక్ర మార్గంలో పొందిన అనుమతులుతో యథేచ్ఛగా అక్రమ నిర్మాణ పనులు చేపడుతోంది.. ఆ భూమి జిల్లా రెవిన్యూ అధికారి కస్టడీలో ఉన్నా కూడా డోంట్ కేర్ అంటూ, ప్రభుత్వ భూమి,ఇండస్ట్రియల్ కో ఆపరేటివ్ బిల్డింగ్ సొసైటీ భూములను 
కాచేయుటకు ఏ.ఆర్. డెవలపర్స్ అనే నిర్మాణ సంస్థ తన వక్ర బుద్దిని చూపించింది అనడంలో ఎటువంటి సందేహం లేదు.. ఏ.ఆర్. డెవలపర్స్ నిర్మాణ సంస్థతో అమీన్  పూర్ మున్సిపల్ కమిషనర్ లోపాయికారి ఒప్పందం చేసుకుని, అక్రమార్జనే ద్యేయంగా అందిన కాడికి దోచుకొని సదరు నిర్మాణ సంస్థకు వత్తాసు పలుకుతున్నారని బహిరంగ విమర్శలు వెల్లువెత్తుతున్నాయి.. బోగస్ పత్రాలతో సదరు నిర్మాణ సంస్థ యథేచ్ఛగా అక్రమ నిర్మాణాలు నిర్మిస్తుంటే..  మున్సిపల్ కమిషనర్ సుజాత అటువైపు కన్నెత్తి చూడకపోవడంతో వారి అవినీతికి అద్ధం పడుతుంది..  క్షేత్ర స్థాయి సిబ్బంది అవినీతి, అక్రమాలకు పాల్పడితే విచారణ జరిపించి చర్యలు తీసుకోవాల్సిన కమిషనరే, అక్రమ నిర్మాణాలను ప్రోత్సహిస్తున్నారనే విమర్శలు వ్యక్తమవుతున్నాయి.. మున్సిపాల్టీలలో ఎటువంటి అవినీతి, అక్రమాలకు తావు లేకుండా, సజావుగా జరిగేందుకు తెలంగాణ రాష్ట్ర ప్రభుత్వం 2019లో నూతనంగా ప్రవేశ పెట్టిన మున్సిపల్ చట్టం, ఇక్కడ అధికారులు, ప్రజా ప్రతినిధులకు కాసుల వర్షం కురిపిస్తోంది.. అమీన్ పూర్ మున్సిపాల్టీలో అక్రమనిర్మాణాలు పుట్టగొడుగుల్లా పెరిగిపోవడంతో.. ప్రభుత్వం తెచ్చిన నూతన చట్టం బ్రష్టు పడుతుందనే విమర్శలు  వినిపిస్తున్నాయి.. 2018 సంవత్సరంలో అమీన్ పూర్ గ్రామ పంచాయితీ మున్సిపాల్టీ గా ఏర్పడింది.. 2018 సం" లో మున్సిపాల్టీ ఏర్పడ్డది కనుక నిర్మాణ   అనుమతులు పొందాలంటే మున్సిపల్ చట్టం ప్రకారం అనుమతులు తీసుకోవాలి.. మున్సిపాల్టీ ఏర్పడక ముందు గ్రామ పంచాయితి నుండి తీసుకున్న నిర్మాణ అనుమతులు..  పర్మిషన్ తీసుకున్న తేదీ నుండి రెండు సంవత్సరాల కాలపరిమితి మాత్రమే ఉంటుంది.. కానీ అమీన్ పూర్ మున్సిపల్ కమిషనర్ ఆధ్వర్యంలో 2018లో తీసుకున్న అనుమతులు 2022 వరకు ఎలా చెల్లబాటు అవుతున్నాయనేది అంతు చిక్కని ప్రశ్నగా మారింది..? నకిలీ పత్రాలు సృష్టిస్తే వాటిని గుర్తించి అట్టి నకిలీ పత్రాలను సృష్టించిన వ్యక్తులపై క్రిమనల్ చేపట్టాల్సిన అధికారులు ఆదిశగా చర్యలు తీసుకోకపోవడంతో..  భూ కబ్జాలకు పాల్పడే అక్రమార్కులు కోట్ల రూపాయల విలువైన భూములను కొల్లగొడుతున్నారు. అవినీతిలో కూరుకుపోయిన మున్సిపల్ కమిషనర్ సుజాత బోగస్ పత్రాలను, అక్రమ వెంచర్లను  పట్టించుకోకుండా, ధనార్జనే ద్యేయంగా..  ఇష్ట్టమొచ్చినట్లు అనుమతులు జారీ చేసి, భారీ ఎత్తున ముడుపులు దండుకుంటున్నారని  స్థానిక ప్రజలు ఆరోపిస్తున్నారు.. గతంలో కూడా మున్సిపల్ కమిషనర్ సుజాత అవినీతి వ్యవహారాలపై వివిధ పత్రికల్లో..  ఆధారాలతో వార్త కథనాలు ప్రచురితమైనా, వివిధ సంఘాల నుండి పిర్యాదులు అందినా  చర్యలు తీసుకోవాల్సిన కమిషనర్, సంచాలకులు పురపాలక పరిపాలన కార్యాలయ అధికారి సత్యనారాయణ.. ఎలాంటి చర్యలు చేపట్టకుండా  మౌనంగా  ఉండటంతో పలు అనుమానాలకు తావిస్తోంది.. 2018 కంటే ముందు గ్రామ పంచాయతీగా ఉన్న సమయంలో పొందిన ఇంటి నెంబర్లుతో  ఏ.ఆర్.  డెవలపర్స్ అనే నిర్మాణ సంస్థ, బోగస్  పత్రాలతో అక్రమ లే అవుట్లను చేస్తుంటే ..  దర్జాగా  దొడ్డిదారిలో అక్రమ నిర్మాణ పనులు చేస్తుంటే..  మున్సిపల్ అధికారులు చర్యలు ఎందుకు చేపట్టడం లేదని పలువురు ప్రశ్నిస్తున్నారు.. అమీన్ పూర్ మున్సిపాల్టిలో నిర్మాణ అనుమతులు పొందాల్సిన ఏ.ఆర్. డెవలపర్స్  అనే నిర్మాణ సంస్థ, గ్రామ పంచాయితీ ఇంటి నెంబర్లతో అక్రమ నిర్మాణ పనులు చేస్తుంటే..  వీరికి మున్సిపల్ చట్టం వర్తించదా..? అని స్థానికులు ప్రశ్నిస్తున్నారు.. ఏ.ఆర్.  డెవలపర్స్  అక్రమ లే అవుట్ కు సంబంధించిన వ్యవహారాలపై, మున్సిపల్ అధికారులు చేస్తున్న అక్రమ ఆగడాలపై మరో కథనం ద్వారా వెలుగులోకి తేనుంది  
' ఆదాబ్ హైదరాబాద్ '..  ' మా అక్షరం అవినీతిపై అస్రం '..