అజారుద్ధీన్ పై మానవ హక్కుల కమిషన్ లో కంప్లైంట్.

Courtesy by : తొలివెలుగు మీడియా 

హెచ్ సీఏ అధ్యక్షుడు అజారుద్దీన్ పై రాష్ట్ర మానవ హక్కుల కమిషన్ లో ఫిర్యాదు చేశారు బీసీ పొలిటికల్ జేఏసీ చైర్మైన్ రాచాల యుగంధర్ గౌడ్. టికెట్ల విషయంలో నిర్లక్ష్యం, అవినీతికి పాల్పడ్డారని ఫిర్యాదులో పేర్కొన్నారు. వెంటనే అజారుద్దీన్ పై క్రిమినల్ కేసు నమోదు చేసి, పదవి నుండి తొలగించాలని హెచ్చార్సీని ఆశ్రయించారు రాచాల యుగంధర్ గౌడ్. క్రీడాభిమానులపై లాఠీఛార్జికి కారకుడైన అజారుద్దీన్ తో పాటు హెచ్ సీఏ నిర్వాకులపై క్రిమినల్ కేసులు నమోదు చేయాలని ఆయన డిమాండ్ చేశారు. జింఖానా గ్రౌండ్స్ వద్ద తొక్కిసలాటకు ప్రధాన కారణం హెచ్ సీఏతో పాటు ప్రభుత్వ నిర్లక్ష్యంమే కారణమన్నారు.

ఉప్పల్ లో జరగబోయే ఇండియా వర్సెస్ ఆస్ట్రేలియా టీ20 మ్యాచ్ కు ఏర్పాట్ల విషయంలో హెచ్ సీఏ పూర్తి వైఫల్యం చెందిందన్నారు. క్రీడాభిమానుల నుండి లక్షల, కోట్ల రూపాయలు దండుకొని.. టికెట్ల విషయంలో సరైన ఏర్పాట్లు చేయని హెచ్ సీఏ, ఇతర రాజకీయ నాయకులు క్షతగాత్రులను పరామర్శించకపోవడం బాధాకరమన్నారు. చికిత్స పొందుతున్న క్షతగాత్రులకు 20 లక్షల ఎక్స్ గ్రేషియా ప్రకటించాలని డిమాండ్ చేశారు బీసీ పొలిటికల్ జేఏసీ చైర్మైన్ రాచాల యుగంధర్ గౌడ్.

కాగా నిన్న జింఖానా గ్రౌండ్స్ వద్ద ఉద్రిక్తత వాతావరణం నెలకొన్న సంగతి తెలిసిందే. ఈ నెల 25న జరిగే ఇండియా వర్సస్ ఆస్ట్రేలియా టీ20  మ్యాచ్ టికెట్లకు భారీ డిమాండ్ నెలకొంది. దీంతో సికింద్రాబాద్ లోని జింఖానా గ్రౌండ్ కి భారీ సంఖ్యలో జ‌నాలు త‌ర‌లివ‌చ్చారు. కానీ గేట్లు మూసి వేసి ఉండ‌టం, అధికారులెవ‌రూ లేక‌పోవ‌డంతో ఫ్యాన్స్ గేట్లు దూకి లోప‌లికి ప్ర‌వేశించారు.

ఈ క్రమంలో టికెట్లు విక్రయం  ఆలస్యమవుతుండటంతో క్రికెట్ అభిమానులు అసహనం వ్యక్తం చేశారు. దీంతో పోలీసులకు, అభిమానులకు మధ్య తోపులాట చోటు చేసుకుంది. పరిస్థితి అదుపుతప్పడంతో పోలీసులు లాఠీఛార్జ్ ప్రయోగించారు. ఈ  తోపులాటలో 20 మంది క్రికెట్ అభిమానులు స్పృహ తప్పి పడిపోయారు. అంతేగాక ఈ ఘటనలో పలువురు గాయలపాలయ్యారు.