బాణసంచా వెలుగుల్లో కాంతులీనిన కొత్త సచివాలయం..
హైదరాబాద్: తెలంగాణ నూతన సచివాలయ ప్రారంభోత్సవం అట్టహాసంగా జరిగింది..
సచివాలయ ఆవరణలో బాణసంచా పేల్చి చేసిన సంబురాలు అబ్బురపరిచాయి..
రంగు రంగుల విద్యుత్ దీపాల వెలుగుల్లో కాంతూలీనిన కొత్త సెక్రెటేరియేట్‌ నగరవాసులను విశేషంగా ఆకట్టుకుంది..
తెలంగాణ నూతన సచివాలయాన్ని ప్రారంభించిన.... సీఎం కేసీఆర్....!*
హైదరాబాద్: తెలంగాణ నూతన సచివాలయాన్ని ముఖ్యమంత్రి కేసీఆర్ ప్రారంభించారు. తొలుత ప్రధాన ప్రవేశ గేటు వద్ద పూజలు నిర్వహించిన ఆయన..
తర్వాత ప్రాంగణంలో ఏర్పాటు చేసిన హోమశాల వద్ద యాగ పూర్ణాహుతిలో పాల్గొన్నారు. అక్కడి నుంచి ప్రధాన ద్వారం వద్దకు చేరుకుని సచివాలయాన్ని ప్రారంభించారు. ఆ తర్వాత వాస్తుపూజ నిర్వహించారు. అనంతరం కేసీఆర్ ఆరో అంతస్తులోని తన ఛాంబర్‌కు చేరుకొని పలు దస్త్రాలపై సంతకాలు చేశారు. ప్రారంభోత్సవ కార్యక్రమ నిర్వహణకు పెద్ద సంఖ్యలో వేదపండితులు హాజరయ్యారు. ప్రధాన గేటు వద్ద ముఖ్యమంత్రిని వేద మంత్రోచ్ఛారణలతో స్వాగతించి ఆశీర్వచనాలు పలికారు.
నూతన సచివాలయంలో మొత్తం 6 ఫైళ్లపై సీఎం సంతకాలు చేశారు. వీటిలో ఒప్పంద ఉద్యోగుల క్రమబద్ధీకరణ దస్త్రంపై ఆయన తొలి సంతకం చేశారు. అనంతరం యాదాద్రి టేబుల్‌ బుక్‌ను కేసీఆర్ ఆవిష్కరించారు. తన ఛాంబర్‌లో ఆసీనులైన సీఎంకు మంత్రులు, ఎమ్మెల్యేలు, ఎమ్మెల్సీలు, ఇతర ప్రజాప్రతినిధులు, సీఎస్‌, డీజీపీ, ఇతర ఉన్నతాధికారులు శుభాకాంక్షలు తెలిపారు. కేసీఆర్‌కు మంత్రి హరీశ్‌రావు పాదాభివందనం చేశారు. మరోవైపు మంత్రులు కూడా సుముహూర్త సమయంలో తమ ఛాంబర్లలోకి ప్రవేశించారు. మంత్రులు కేటీఆర్‌, హరీశ్‌రావు, ప్రశాంత్‌రెడ్డి, గంగుల కమలాకర్‌ తదితరులు నిర్ణయించిన సమయానికి తమ సీట్లలో ఆసీనులయ్యారు.
*సుజీవన్ వావిలాల*🖋️
*నా భర్తతో పాటే నన్నూ...చితిపైకి చేరిన అమర జవాన్ భార్య*
భోపాల్‌: ఏప్రిల్ 26వ తేదీ బుధవారం ఛత్తీస్‌గఢ్‌ దంతేవాడలో జరిగిన మావోయిస్టుల దుశ్చర్య.. యావత్ దేశాన్ని దిగ్భ్రాంతికి గురి చేసింది.యాభై కేజీల మందుపాతరతో పది మంది డీఆర్‌జీ జవాన్లు, ఓ డ్రైవర్‌ బలిగొన్నారు మావోయిస్టులు. ఈ ఘటనలో అమరలైన జవాన్లకు ప్రభుత్వం తరపున గౌరవవందనం అందగా.. అనంతరం అయినవాళ్ల మధ్య అంత్యక్రియలు పూర్తయ్యాయి.
అయితే.. దంతేవాడ మావోయిస్టుల దాడిలో అమరుడైన డీఆర్‌జీ జవాన్ భార్య.. ఆత్మాహుతికి సిద్ధపడింది. భర్తతో పాటే తననూ చితి మీద కాల్చేయండంటూ గ్రామస్తులను, బంధువులను బతిమాలుకుందామె. ఆ దృశ్యం అందరినీ కంటతడి పెట్టింది. చివరికి ఆమెను అంతా బలవంతంగా చితిపై నుంచి బయటకు లాక్కొచ్చారు. భర్త మరణంతో తన బతుకు చీకట్లోకి కూరుకుపోయిందని, ఇంక తాను ఎవరి కోసం బతకాలని ఆవేదన వ్యక్తం చేస్తోందామె.
అమర జవాన్ లఖ్మూ మార్కం అంత్యక్రియలకు ఊరు ఊరంతా కదిలి వచ్చింది. షాహీద్‌ జవాన్.. అమర్ రహే అంటూ కన్నీటి నినాదాలతో అంతిమ యాత్ర నిర్వహించారు. విధి నిర్వహణలో ప్రాణం పొగొట్టుకున్నందుకు నివాళి.. ఊరంతా లఖ్మూ మృతదేహాన్ని తాకి నివాళులర్పించారు.
*సుజీవన్ వావిలాల*🖋️
*జేఈఈ మెయిన్ ఫలితాలు.... హైదరాబాద్ విద్యార్థికి మొదటి ర్యాంక్!*
దిల్లీ: దేశంలోని ప్రతిష్టాత్మక విద్యాసంస్థల్లో ఇంజినీరింగ్‌ కోర్సుల్లో ప్రవేశం కోసం నిర్వహించిన జేఈఈ మెయిన్ 2023 సెషన్‌-2 ఫలితాలు విడుదలయ్యాయి.ఫలితాల్లో తెలుగు రాష్ట్రాల విద్యార్థులు సత్తా చాటారు. జేఈఈ మెయిన్‌లో హైదరాబాద్ (Hyderabad) విద్యార్థి సింగారపు వెంకట్‌ కౌండిన్య మొదటి ర్యాంక్ సాధించాడు. 300/300 మార్కులు స్కోర్‌ చేశాడు. కౌండిన్య పాఠశాల విద్య నుంచి ఇంటర్ వరకు హైదరాబాద్‌లోని శ్రీచైతన్య విద్యా సంస్థల్లో చదివాడు. జూన్‌ 4వ తేదీన జరిగే జేఈఈ అడ్వాన్స్‌డ్‌లో ఉత్తమ ర్యాంకు సాధించి ఐఐటీ బాంబేలో బీటెక్‌ కంప్యూటర్‌ సైన్స్‌ చదువుతానని కౌండిన్య తెలిపాడు.
*సుజీవన్ వావిలాల*🖋️
*ఎమ్మేల్యేలు జాగ్రత్తగా పని చేయకపోతే తోకలు కట్ చేస్తా*
*సిట్టింగ్ ఎమ్మెల్యేలకు కేసీఆర్ సీరియస్ వార్నింగ్*
హైదరాబాద్: ముఖ్యమంత్రి కేసీఆర్ ఆధ్వర్యంలో గురువారం తెలంగాణ భవన్లో బీఆర్ఎస్ జనరల్ బాడీ సమావేశం జరిగింది. ఈ కార్యక్రమానికి మంత్రులు, ప్రజాప్రతినిధులు హాజరయ్యారు. ఈ భేటీలో పలు కీలక అంశాలపై చర్చలు జరిపి నిర్ణయాలు తీసుకున్నారు.
తీర్మానాలు ఇవే..
-- దేశంలో గుణాత్మకమైన మార్పును సాధించే దిశగా బిఆర్ఎస్ ఉద్యమ స్పూర్తితో పురోగమించాలని కోరుతూ తీర్మానం..
- దేశానికి సాగునీటి విధానం రూపొందించాలి...
- వ్యవసాయానికి పెట్టుబడి సాయం దేశ వ్యాప్తంగా అమలు చేయాలని..
- భారత ప్రజలను ఏకం చేసి బలీయమైన రాజకీయ శక్తిగా బిఆర్ఎస్ ముందుకు వెళ్లాలని..
- బీఆర్ఎస్ నేతృత్వంలో దేశ అవసరాలకు సమగ్ర సాగునీటి విధానం రూపొందించాలని..
- తెలంగాణలో వున్న రైతు రాజ్యం దేశం అంతటా స్థాపించాలని..ఇందుకోసం అలుపెరుగని పోరాటం దిశగా బిఆర్ఎస్ ముందుకు వెళ్ళాలని..
- కేంద్ర ప్రజా వ్యతిరేక విధానాలను తుదముట్టించేందుకు బీఆర్ఎస్ దేశ వ్యాప్తంగా ఉద్యమాలు నిర్మించాలని..
- నూతన విద్యుత్ విధానాన్ని బీఆర్ఎస్ అమల్లోకి తీసుకురావాలని...
- దళిత బంధు పధకాన్ని దేశ వ్యాప్తంగా అమలు చేయాలని..
- దేశంలో మౌళిక వసతుల కల్పన చేయాలని...
- కేంద్రంలో బీసీ సంక్షేమ మంత్రిత్వ శాఖను ఏర్పాటు చేయాలని...
- మతోన్మాద శక్తుల పట్ల యువత అప్రమత్తంగా ఉండాలని సమావేశంలో తీర్మానాలు చేశారు.
*సిట్టింగ్ ఎమ్మెల్యేలకు కేసీఆర్ సీరియస్ వార్నింగ్*
కాగా ఎన్నికలపై సీఎం కేసీఆర్ నేతలను ఉద్దేశించి మాట్లాడారు.. షెడ్యూల్ ప్రకారమే అసెంబ్లీ ఎన్నికలు జరుగుతాయని స్పష్టం చేశారు. ఈ సందర్భంగా సిట్టింగ్ ఎమ్మెల్యేలకు ముఖ్యమంత్రి సీరియస్ వార్నింగ్ ఇచ్చారు. ఎమ్మెల్యేలు జాగ్రత్తగా పనిచేసుకోవాలన్నారు. లేకపోతే నష్టపోతారని, సరిగ్గా పనిచేయని ఎమ్మెల్యేల తోకలు కట్ చేస్తానని హెచ్చరించారు. కాగా ముందుగా కే కేశవరావు ప్రసంగంతో సమావేశం ప్రారంభమైంది. అనంతరం బీఆర్ఎస్ అధినేత కేసీఆర్ ప్రసంగించారు. తర్వాత బీఆర్ఎస్ వర్కింగ్ ప్రెసిడెంట్ మంత్రి కేటిఆర్ తీర్మానాలను ప్రవేశ పెట్టారు.
*సుజీవన్ వావిలాల*🖋️
*అమిత్ షా తెలంగాణ పర్యటనపై.... మంత్రి KTR కౌంటర్....!*
హైదరాబాద్: కేంద్ర హోం మంత్రి అమిత్ షా తెలంగాణ పర్యటనపై మంత్రి కేటీఆర్‌ ట్విటర్‌ వేదికగా స్పందించారు. ఈ తొమ్మిదేళ్లలో తెలంగాణ కంటే మెరుగ్గా ఉన్న భాజపా పాలిత రాష్ట్రం ఒక్కటైనా చూపగలరా?అని ప్రశ్నించారు. రాష్ట్రానికి కేంద్రం చేసింది ఏమీలేదని ఎద్దేవా చేశారు. తెలంగాణకు ఐటీఐఆర్‌ మంజూరు చేయలేదని, పాలమూరు-రంగారెడ్డికి జాతీయ హోదా ఇవ్వలేదన్నారు. మెట్రో రెండో దశ, ఐఐఎం ఏర్పాటు చేయలేదని వంగ్యాస్త్రం సంధించారు. ఐఐఎస్‌ఆర్‌, ట్రిపుల్‌ ఐటీ, ఐఐటీ, ఎన్‌ఐడీ, నవోదయాలు, మెడికల్‌, నర్సింగ్‌ కళాశాలలు.. ఇవన్నీ మంజూరు చేయలేదని మంత్రి కేటీఆర్‌ ట్విటర్‌ వేదికగా విమర్శలు సంధించారు.
*సుజీవన్ వావిలాల*🖋️
*కేసీఆర్.....ప్రధాని సీటు ఖాళీగా లేదు.... అమిత్ షా....!*
చేవెళ్ల: సీఎం కేసీఆర్ ప్రధాని కావాలని కలలు కంటున్నారు.. ప్రధాని సీటు ఖాళీగా లేదని కేసీఆర్ తెలుసుకోవాలని కేంద్ర హోం మంత్రి అమిత్ షా అన్నారు.వచ్చే ఎన్నికల తర్వాత కూడా మోదీనే ప్రధాని అని పేర్కొన్నారు. కేసీఆర్ ముందు సీఎం సీటు కాపాడుకుంటే చాలని ఎద్దేవా చేశారు. ప్రధానమంత్రి నరేంద్ర మోదీని ప్రజల నుంచి సీఎం కేసీఆర్ దూరం చేయలేరని అన్నారు. భాజపా పార్లమెంట్‌ ప్రవాస్‌ యోజనలో భాగంగా చేవెళ్లలో ఏర్పాటు చేసిన విజయ సంకల్ప సభలో అమిత్ షా ముఖ్య అతిథిగా పాల్గొన్నారు. ఈ సందర్భంగా ఆయన మాట్లాడుతూ... కేసీఆర్ భారాస పేరుతో దేశమంతా విస్తరించాలనుకుంటున్నారని, అందులో భాగంగా ప్రజా ధనాన్ని దుర్వినియోగం చేస్తున్నారని ఆరోపించారు. కారు స్టీరింగ్‌ మజ్లీస్‌ చేతుల్లో ఉందని, మజ్లిస్‌కు భాజపా భయపడేది లేదని స్పష్టం చేశారు. మజ్లిస్‌కు భయపడే భారాస ప్రభుత్వం.. తెలంగాణ విమోచన దినం కూడా నిర్వహించట్లేదన్నారు.
''టీఎస్‌పీఎస్సీ పరీక్ష పేపర్లు లీకవుతున్నాయి. లీకేజీలపై కేసీఆర్ ఒక్క మాట కూడా మాట్లాడరు. యువకుల జీవితాలతో సీఎం ఆటలాడుతున్నారు. లీకేజీలతో నిరుద్యోగుల జీవితాలను అంధకారంలోకి నెట్టారు. పేపర్‌ లీకేజీపై ప్రశ్నించిన బండి సంజయ్‌ను జైల్లో పెట్టారు. 24 గంటల్లో సంజయ్‌కు బెయిల్‌ వచ్చింది. ఈటల రాజేందర్‌ను అసెంబ్లీకి వెళ్లకుండా చేయాలనుకున్నారు. కానీ, వారికి సాధ్యం కాలేదు. జైళ్లకు వెళ్లేందుకు భాజపా కార్యకర్తలు భయపడరు. మిమ్మల్ని గద్దె దించేవరకు మా కార్యకర్తలు విశ్రమించరు. రాష్ట్రంలో భాజపా అధికారంలోకి వస్తే దొంగలను జైల్లో వేస్తాం. ముస్లిం రిజర్వేషన్లు రద్దు చేస్తాం. కేసీఆర్‌కు మళ్లీ చెబుతున్నా.. మావాళ్లు జైళ్లకు భయపడరు. ఈ లీకేజీల ప్రభుత్వానికి కొనసాగే అర్హత ఉందా? టీఎస్‌పీఎస్సీ లీకేజీపై హైకోర్టు సిట్టింగ్ జడ్జితో విచారణ జరిపించాలి. అసెంబ్లీ ఎన్నికల్లో భాజపాను భారీ మెజార్టీతో గెలిపించాలి'' అని అమిత్ షా తెలంగాణ ప్రజలకు విజ్ఞప్తి చేశారు.
*సుజీవన్ వావిలాల*🖋️
*ఒట్టేసే అవసరం నాకు లేదు.... రేవంత్ సవాల్ పై స్పందించిన ఈటల*
హైదరాబాద్: పీసీసీ అధ్యక్షుడు రేవంత్ రెడ్డి విసిరిన సవాల్‌పై భాజపా ఎమ్మెల్యే ఈటల రాజేందర్‌ స్పందించారు. వ్యక్తిగతంగా తాను ఎవరినీ కించపరచలేదన్నారు.తనకు కూడా ఆత్మవిశ్వాసం ఉందని.. అమ్మవారి మీదనో, తల్లి మీదనో ఒట్టేసే అవసరం తనకు లేదని చెప్పారు. దేవుళ్లపై ప్రమాణం చేసే సంప్రదాయాన్ని పాటించట్లేదని స్పష్టం చేశారు. దీనిపై తగిన సమయంలో జవాబిస్తానని వెల్లడించారు. మునుగోడు ఉప ఎన్నికల్లో భారాస భారీగా డబ్బు ఖర్చు పెట్టిందని ఈటల ఆరోపించారు.మునుగోడు ఉప ఎన్నికలో కాంగ్రెస్‌కు భారాస డబ్బులు పంపిందని భాజపా ఎమ్మెల్యే, మాజీ మంత్రి ఈటల రాజేందర్‌ ఆరోపించగా.. పీసీసీ అధ్యక్షుడు రేవంత్‌రెడ్డి తీవ్రంగా స్పందించారు. భారాస నుంచి, సీఎం కేసీఆర్ నుంచి ఒక్క రూపాయి కూడా సాయం పొందలేదన్నారు. ఈ వ్యవహారంపై భాగ్యలక్ష్మి అమ్మవారిపై తాజాగా రేవంత్ ప్రమాణం చేశారు. ''అమ్మవారిని నమ్ముతాను కాబట్టే ప్రమాణం చేశాను. దేవుడిపై విశ్వాసం ఉంటే ఈటల తన మాటలను ఉపసంహరించుకోవాలి. వ్యక్తిగత రాజకీయ ప్రయోజనాల కోసం ఆయన దిగజారి మాట్లాడుతున్నారు. తాను విసిరిన సవాల్ మేరకు చార్మినార్‌ వద్దనున్న భాగ్యలక్ష్మి దేవాలయంలో ప్రమాణం చేశాను. ఈటల తన ఆరోపణలను నిరూపించుకోవాలి'' అని రేవంత్ సవాల్ విసిరారు. ఈ వ్యవహారం తాజాగా రాజకీయ వర్గాల్లో తీవ్ర దుమారం రేపుతోంది.
*సుజీవన్ వావిలాల*🖋️
*రాజీపడటం నారక్తంలో లేదు భయం నా ఒంట్లో లేదు.... రేవంత్!*
హైదరాబాద్: ముఖ్యమంత్రి కేసీఆర్‌తో లాలూచీ తన రక్తంలోనే లేదని టీపీసీసీ అధ్యక్షుడు రేవంత్‌రెడ్డి అన్నారు. తుదిశ్వాస విడిచే వరకు కేసీఆర్‌తో రాజీ పడే ప్రసక్తే లేదన్నారు.మునుగోడు ఉపఎన్నికల్లో కాంగ్రెస్‌కు కేసీఆర్ రూ.25 కోట్లు ఇచ్చారంటూ భాజపా నేత ఈటల రాజేందర్‌ వ్యాఖ్యానించడాన్ని రేవంత్ తీవ్రంగా తప్పుబట్టారు. ఈ మేరకు చార్మినార్‌ వద్దనున్న భాగ్యలక్ష్మి అమ్మవారి ఆలయం వద్ద ప్రమాణం చేశారు. 'ఒక వేళ మునుగోడు ఉప ఎన్నికలో కేసీఆర్ నుంచి ఒక్క రూపాయి తీసుకున్నా.. నా కుటుంబం మొత్తం సర్వనాశనమైపోతుంది' అని రేవంత్ రెడ్డి అన్నారు.
అనంతరం రేవంత్ రెడ్డి మీడియాతో మాట్లాడుతూ.. మునుగోడు ఉపఎన్నిక పరిణామాలు అందరికీ తెలుసని అన్నారు. భారాస, భాజపాలు భారీగా డబ్బులతో బరిలోకి దిగితే.. కాంగ్రెస్ మాత్రం నిజాయితీగా పని చేసే అభ్యర్థి పాల్వాయి స్రవంతిని పోటీలో నిలిపిందని గుర్తు చేశారు. '' మునుగోడు ఉపఎన్నిక కోసం భారాస, భాజపా భారీగా డబ్బులు ఖర్చు చేశాయి. మునుగోడు ఉపఎన్నికలో కాంగ్రెస్ అమ్ముడు పోయిందని ఈటల ఆరోపించారు. కేసీఆర్ నుంచి కాంగ్రెస్ పార్టీ, పాల్వాయి స్రవంతి రూ.25 కోట్లు తీసుకున్నట్లు విమర్శించారు. నా నిజాయితీని శంకిస్తే మంచిది కాదు. నా కళ్లలో నీరు రప్పించావు. కేసీఆర్ సర్వం దారబోసినా రేవంత్ రెడ్డిని కొనలేరు. రాజీ నా రక్తంలో లేదు.. భయం నా ఒంట్లో లేదు.'' అని రేవంత్ రెడ్డి అన్నారు.
*సుజీవన్ వావిలాల*🖋️
*టీ - సేవ్ నిరాహార దీక్షకు.... హైకోర్టు ఓకే*
హైదరాబాద్: టీ-సేవ్ నిరాహార దీక్షకు తెలంగాణ హైకోర్టు గ్రీన్‌ సిగ్నల్‌ ఇచ్చింది. ఇందిరాపార్కు వద్ద అఖిలపక్షం ఆధ్వర్యంలో చేపట్టే నిరాహార దీక్షకు షరతులతో కూడిన అనుమతిచ్చింది.నిరాహార దీక్షకు 500 మంది కంటే ఎక్కువ పాల్గొనవద్దని.. దీక్షకు 48 గంటల ముందు పోలీసులకు సమాచారం ఇవ్వాలని సూచించింది. రాష్ట్రంలో నిరుద్యోగ యువతకు ఉద్యోగాల సాధనే లక్ష్యంగా రాష్ట్ర ప్రభుత్వానికి వ్యతిరేకంగా అన్ని పార్టీల ఆధ్వర్యంలో ఈ దీక్ష సాగనుంది.
నిరుద్యోగ యువతకు మద్దతుగా నిర్వహించదలచిన అఖిలపక్ష నిరాహార దీక్షకు అనుమతి మంజూరు చేసేలా పోలీసులకు ఆదేశాలు జారీ చేయాలంటూ వైతెపా అధ్యక్షురాలు షర్మిల ఇటీవల హైకోర్టులో పిటిషన్‌ దాఖలు చేశారు. ఈనెల 17న నిర్వహించదలచిన నిరాహార దీక్షకు అనుమతిని నిరాకరిస్తూ పోలీసులు జారీచేసిన ఉత్తర్వులను సవాల్ చేస్తూ షర్మిల పిటిషన్‌ దాఖలు చేశారు. తెలంగాణ పబ్లిక్‌ సర్వీస్ కమిషన్‌ (టీఎస్‌పీఎస్సీ) ప్రశ్నపత్రాల లీకేజీల నేపథ్యంలో.. నిరుద్యోగ యువతకు మద్దతుగా ఇందిరాపార్కు వద్ద అఖిలపక్ష నిరాహార దీక్షకు అనుమతిని కోరుతూ పోలీసులకు వినతిపత్రం సమర్పించారని పిటిషన్‌లో పేర్కొన్నారు. దీనిపై విచారణ చేపట్టిన ఉన్నత న్యాయస్థానం షరతులతో కూడిన అనుమతులు మంజూరు చేసింది.
*సుజీవన్ వావిలాల*🖋️
*_కర్నాటక ఎన్నికల బరిలో బిచ్చగాడు_*
_★ భిక్షాటనతో సేకరించిన చిల్లరతో నామినేషన్‌ సమర్పణ_
_(అనంచిన్ని వెంకటేశ్వరరావు, పరిశోధన పాత్రికేయులు, 9440000009)_
'దేశంలో ఏ ఎన్నికల్లో నిలబడాలి' అన్నా స్థాయిని బట్టి నోట్ల ఖర్చు మారుతుంది. అయితే కర్ణాటక విధానసభ ఎన్నికల్లో యాదగిరి పట్టణానికి చెందిన యంకప్ప అనే యాచకుడు స్వతంత్ర అభ్యర్థిగా పోటీకి దిగుతున్నారు. గురువారం నామపత్రం సమర్పించారు. ఇందుకు భిక్షాటనతో పోగు చేసిన రూ.10 వేలను డిపాజిట్‌గా చెల్లించారు. ఎన్నికల తేదీ ప్రకటించినప్పటి నుంచి డిపాజిట్‌కు కావాల్సిన డబ్బు కోసం యాదగిరి నియోజకవర్గంలో తిరుగుతూ యాచించారు. అలా సేకరించిన నాణేలనే గురువారం ఎన్నికల అధికారికి ఇచ్చారు. 2 గంటలు శ్రమించి చిల్లరంతా లెక్కించి, నామినేషన్‌ స్వీకరించినట్లు అధికారి తెలిపారు. అనంతరం యంకప్ప మాట్లాడుతూ.. ‘నేను ఎందుకు పోటీ చేస్తున్నానో ప్రజలకు చెప్పా. వారి నుంచే డిపాజిట్‌ డబ్బూ సమీకరించా’ అని తెలిపారు. పగలు భిక్షాటన చేస్తూ పొట్టపోసుకునే యంకప్ప రాత్రిళ్లు ఆలయాల లోగిళ్లలో పడుకుంటారు.
*టిఆర్ఎస్ ను వీడు తానన్న వార్తల్లో....వాస్తవం లేదు.....!*
*తెలంగాణ డిప్యూటీ స్పీకర్‌ పద్మారావుగౌడ్‌*
హైదరాబాద్: టీఆర్ఎస్ పార్టీని వీడుతున్నట్లు వస్తున్న వార్తల నేపథ్యంలో అసెంబ్లీ డిప్యూటీ స్పీకర్‌ పద్మారావుగౌడ్‌ మంగళవారం మంత్రి కేటీఆర్‌తో భేటీ అయ్యారు.ఇటీవల జరిగిన కొన్ని పరిణామాలపై ఇరువురి మధ్య ప్రస్తావనకు వచ్చినట్లు తెలిసింది. మాజీ ఎంపీ బూర నర్సయ్యగౌడ్‌ టీఆర్‌ఎస్‌కు రాజీనామా చేసిన నేపథ్యంలో పద్మారావు కూడా పార్టీని వీడుతున్నట్లు సామాజిక మాధ్యమాల్లో విస్తృత ప్రచారం జరిగింది.
పద్మారావుతో కేంద్రమంత్రి కిషన్‌రెడ్డి భేటీ కావడం ఈ వార్తలకు ఊతం ఇచ్చింది. అయితే తాను పార్టీని వీడుతున్నట్లు వస్తున్న వార్తల్లో వాస్తవం లేదని, ఉద్యమ సమయం నుంచి ఉన్న అనుబంధం కొనసాగుతుందని ఈనెల 16న పద్మారావు ఒక ప్రకటన విడుదల చేశారు.
మరోవైపు పద్మారావుగౌడ్‌తో భేటీకి ఎలాంటి రాజకీయ ప్రాధాన్యం లేదని కిషన్‌రెడ్డి ప్రకటించారు. ఇదిలా ఉంటే మునుగోడు ఉపఎన్నిక ప్రచారంలో పద్మారావుగౌడ్‌ కూడా పాల్గొంటారని టీఆర్ఎస్ వర్గాలు వెల్లడించాయి.
*సుజీవన్ వావిలాల*🖋️
*కొడుకు పోయిన భాధ ఎలావుంటుందో తెలుసు....హత్విక్ ను దత్తత తీసుకుంటా... MP కోమటి రెడ్డి*
నల్గొండ: హైదరాబాద్‌లోని కుషాయిగూడలో జరిగిన అగ్ని ప్రమాదంలో మరణించిన నరేశ్, అతడి భార్య సుమ, కుమారుడు జస్విత్‌ మృతదేహాలకు సోమవారం అంత్యక్రియలు పూర్తయ్యాయినరేశ్‌ స్వగ్రామం.. సూర్యాపేట జిల్లా మద్దిరాల మండలం రెడ్డిగూడెంలో కుటుంబసభ్యులు, బంధుమిత్రులు కన్నీటి వీడ్కోలు పలికారు. కాగా, ప్రమాదంలో తల్లిదండ్రులతో పాటు సోదరుడిని కోల్పోయిన నరేశ్ పెద్ద కుమారుడు హాత్విక్‌ను దత్తత తీసు కుంటానని భువనగిరి పార్లమెంట్‌ సభ్యుడు కోమటిరెడ్డి వెంకట్‌రెడ్డి ప్రకటించారు.
ఢిల్లీలో ఉన్న ఆయన తన పీఏ సైదులుతో హాత్విక్‌ పేరిట బ్యాంకులో రూ. లక్ష డిపాజిట్‌ చేయించారు. ఖర్చుల నిమిత్తం నరేశ్ తల్లిదండ్రులకు రూ.25వేలను అందజేయించారు. నరేశ్ తల్లిదండ్రులను ఫోన్‌లో ఓదార్చారు. కొడుకు పోయిన బాధ ఎలా ఉంటుందో తనకు తెలుసని, అధైర్య పడొద్దని, అండగా ఉంటానని వారికి భరోసా ఇచ్చారు. నరేశ్ కొడుకును ఇంటర్నేషనల్‌ స్కూ ల్లో చదివిస్తానని, పూర్తి బాధ్యత తానే తీసుకుంటానని, ఢిల్లీ నుంచి రాగానే, గ్రామానికొచ్చి కలుస్తానని నరేష్‌ కుటుంబసభ్యులకు మనోధైర్యం కల్పించారు.
*సుజీవన్ వావిలాల*🖋️
నిజామాబాద్ ఆసుపత్రి ఘటనపై స్పందించిన.... మంత్రి హరీష్ రావ్....!
నిజామాబాద్ ప్రభుత్వ ఆస్పత్రికి సంబంధించి సోషల్ మీడియాలో ఓ వీడియో వైరల్ అవుతున్న విషయం తెలిసిందే. ఇప్పటికే ఈ వీడియోపై ఆస్పత్రి సూపరింటెండెంట్ స్పందించారు.తాజాగా ఈ ఘటనపై రాష్ట్ర వైద్య ఆరోగ్య శాఖ మంత్రి కూడా స్పందించారు. ఈ ఘటనపై తక్షణమే విచారణ జరపాలని డైరెక్టర్ ఆఫ్ మెడికల్‌ ఎడ్యుకేషన్‌ను ఆదేశించారు. వీలైనంత త్వరగా నిజానిజాలు తేల్చి నివేదిక అందజేయాలని అన్నారు.
ఓ రోగిని ఇద్దరు సహాయకులు రెండు కాళ్లు పట్టుకుని ఈడ్చుకెళ్తున్న దృశ్యాలు ఆ వీడియోలో కనిపిస్తున్నాయి. ప్రభుత్వ ఆస్పత్రి సిబ్బంది నిర్లక్ష్యంగా వ్యవహరించడంతోనే రోగి రెండు కాళ్లు పట్టుకుని లాక్కెళ్లాల్సి వచ్చిందని పెద్ద ఎత్తున ప్రచారం జరుగుతోంది.
దీనిపై నిజామాబాద్ ప్రభుత్వ ఆస్పత్రి సూపరింటెండెంట్ ప్రతిమారాజ్‌ వివరణ ఇచ్చారు. వీల్‌ఛైర్‌ తీసుకొచ్చేలోపు లిఫ్ట్‌ రావడంతో రోగి తల్లిదండ్రులు అతని కాళ్లు పట్టుకుని లాక్కెళ్లారని చెప్పారు. ఇది చూసి సిబ్బంది వారించి.. వీల్‌ఛైర్‌లో తీసుకెళ్లారని స్పష్టం చేశారు. ఇదంతా తెలియక ఎవరో ఒక వ్యక్తి వీడియో తీసి సోషల్ మీడియాలో ప్రచారం చేశారని పేర్కొన్నారు.
*సుజీవన్ వావిలాల*🖋️
జులై 1 నుంచి... అమర్ నాథ్ యాత్ర*
జమ్మూ: దక్షిణ కశ్మీర్‌లోని హిమాలయాల్లో 3,880 మీటర్ల ఎత్తున ఉన్న అమర్‌నాథ్‌ పుణ్యక్షేత్ర వార్షిక యాత్ర జులై 1 నుంచి మొదలై ఆగస్టు 31 వరకు కొనసాగుతుందని అధికారులు వెల్లడించారు.ఏప్రిల్ 17 నుంచి యాత్రికులు తమ పేర్లను నమోదు చేసుకోవచ్చు. జమ్మూకశ్మీర్‌ లెఫ్టినెంట్‌ గవర్నర్‌ (ఎల్జీ) మనోజ్‌ సిన్హా అధ్యక్షతన రాజ్‌భవన్‌లో జరిగిన శ్రీ అమరనాథ్‌జీ పుణ్యక్షేత్రం బోర్డు 44వ సమావేశంలో యాత్ర షెడ్యూలును నిర్ణయించారు. ఈ సందర్భంగా ఎల్జీ షెడ్యూలును ప్రకటిస్తూ.. ఎలాంటి అవాంతరాలు తలెత్తకుండా, యాత్ర సాఫీగా సాగేలా చూస్తామన్నారు.
యాత్రికులకు వైద్యసేవలు, టెలికాం సదుపాయాలు అందుబాటులో ఉంటాయని తెలిపారు. ఇటు అనంతనాగ్‌ జిల్లాలోని పెహల్గాం ట్రాక్‌ నుంచి, అటు గాందర్‌బల్‌ జిల్లా బల్తాల్‌ నుంచి యాత్ర సమాంతరంగా మొదలవుతుందన్నారు. భక్తుల కోసం ఉదయం, సాయంత్రం జరిగే ప్రార్థనల ప్రత్యక్ష ప్రసారానికి బోర్డు ఏర్పాట్లు చేస్తోంది. మరిన్ని వివరాలను యాప్‌లో చూడవచ్చు.
*సుజీవన్ వావిలాల*🖋️
*హైదరాబాద్ కు చేరుకున్నా అంబేద్కర్ మనవడు, మాజీ ఎంపి ప్రకాష్ యశ్వంత్ అంబేద్కర్*
తెలంగాణ సచివాలయం సమీపంలో తెలంగాణ ప్రభుత్వం ఏర్పాటు చేసిన 125 అడుగుల భారత రాజ్యాంగ నిర్మాణ కర్త డాక్టర్ బాబాసాహెబ్ బి ఆర్ అంబేద్కర్ విగ్రహ ప్రారంభోత్సవ కార్యక్రమం శుక్రవారం రోజు అంబేద్కర్ జయంతిని పురస్కరించుకొని జరగనుండగా ఈ కార్యక్రమనికి ముఖ్యఅతిథిగా అంబేద్కర్ మనవడు,మాజీ ఎంపి ప్రకాష్ యశ్వంత్ అంబేద్కర్ పాల్గొననున్నారు.ఈ రోజు
6 ఈ 2486 విమానంలో ముంబయి నుండి శంషాబాద్ ఎయిర్పోర్ట్ చేరుకున్న ప్రకాష్ అంబేద్కర్ కు శంషాబాద్ ఎయిర్పోర్టులో మంత్రి కొప్పుల ఈశ్వర్ పూల బొకే శాలువాతో ఘన స్వాగతం పలికారు. అనంతరం ప్రకాష్ అంబేద్కర్ శంషాబాద్ ఎయిర్పోర్ట్ నుండి నేరుగా హైదరాబాద్ కు బయలుదేరి వెళ్లారు.
Courtesy by : link Media
*రాహుల్ గాంధీపై మరో పరువునష్టం... కేసు!*
ముంబయి: కాంగ్రెస్ అగ్రనేత రాహుల్ గాంధీపై తాజాగా మరో పరువు నష్టం కేసు నమోదవ్వటం దేశ రాజకీయాల్లో కలకలం సృష్టిస్తోంది. ఇటీవల ఆయన లండన్‌లో జరిగిన ఓ కార్యక్రమంలో మాట్లాడుతూ వీర్‌ సావర్కర్‌ పై చేసిన వ్యాఖ్యలు తీవ్ర దుమారం రేపాయి
ఈ వ్యాఖ్యలకు స్పందించిన సావర్కర్‌ మనవడు సత్యకి సావర్కర్‌ బుధవారం పుణెలోని ఓ కోర్టులో పరువు నష్టం దావా దాఖలు చేశారు.
కాంగ్రెస్ అగ్రనేత నిరాధారంగా తన తాత సావర్కర్‌పై ఆరోపణలు చేశారని సత్యకి ఆగ్రహం వ్యక్తం చేశారు. ఒక గొప్ప వ్యక్తిపై రాహుల్ తప్పుడు ఆరోపణలు చేశారనడానికి తన వద్ద ఆధారాలు ఉన్నట్లు ఆయన తెలిపారు. రాహుల్ చేసిన వ్యాఖ్యలు నిజమని కోర్టులో నిరూపించాలని సవాల్ విసిరారు. 'మోదీ' ఇంటిపేరుపై చేసిన వ్యాఖ్యల కారణంగా కాంగ్రెస్ అగ్రనేతపై ఇప్పటికే పరువు నష్టం కేసు నమోదైన విషయం తెలిసిందే. సూరత్‌ కోర్టు రాహుల్‌ను దోషిగా తేల్చి రెండేళ్ల జైలు శిక్ష కూడా విధించటంతో.. ఎంపీ పదవిని కూడా కోల్పోయారు. ఇదే విషయంలో ఇటీవల పట్నాలోనూ ఆయనపై పరువు నష్టం కేసు నమోదైంది. విచారణకు హాజరు కావాలని పట్నా కోర్టు రాహుల్‌కు నోటీసులు జారీ చేసింది.
*సుజీవన్ వావిలాల*🖋️
*తలవంచడం కాదు.... జనమే సర్కార్ మెడలు వంచుతారు.... జూపల్లి....!*
మహబూబ్‌నగర్‌: తనకు కూడా భావప్రకటనా స్వేచ్ఛ ఉంటుందని.. తప్పు చేసినప్పుడు స్వపక్షమైనా ప్రశ్నించే బాధ్యత ఉంటుందని మాజీ మంత్రి జూపల్లి కృష్ణారావు అన్నారు.తాను అడిగిన ప్రశ్నలకు మంత్రి నిరంజన్‌ రెడ్డి ఇప్పటివరకు ఎలాంటి సమాధానం చెప్పలేదన్నారు. మూడేళ్ల నుంచి తనకు పార్టీ సభ్యత్వ పుస్తకాలు ఇవ్వలేదని.. పార్టీ బాధ్యతలే ఇవ్వకుండా సస్పెండ్ చేశామని ఎలా అంటారని ప్రశ్నించారు. మహబూబ్‌నగర్‌లో జూపల్లి మీడియాతో మాట్లాడారు.
''తెలంగాణ కోసం పోరాటం చేసిన నేతను నేను. తెలంగాణ వద్దన్న నేత వద్దకు వెళ్లి సభ్యత్వం తీసుకోవాలా? ఎంపీ, ఎమ్మెల్సీ ఎన్నికల్లో సంపూర్ణంగా సహకరించాను. నా సహకారం వల్లే రెండు ఎమ్మెల్సీలు ఏకగ్రీవం అయ్యాయి. కేసులతో నా అనుచరులను ఇబ్బంది పెట్టారు. మంత్రి కేటీఆర్‌ సహా అందరికీ సమస్యలు వివరించాను. నాపై ఎన్ని దాడులు జరిగినా ఏ ఒక్కరిపైనా కేసులు పెట్టలేదు. ఇప్పుడు నేను ఎక్కడ కనిపించినా కేసులు పెడుతున్నారు. తలవంచడం కాదు.. జనమే సర్కారు మెడలు వంచుతారు'' అని జూపల్లి వ్యాఖ్యానించారు.
*సుజీవన్ వావిలాల*🖋️
**బలగం మొగిలయ్యకు తీవ్ర అస్వస్థత....!*
ఇటీవల విడుదలైన బలగం చిత్రంలో ఫేమస్‌ అయిన మొగిలయ్య తీవ్ర అస్వస్థతకు గురయ్యారు. తన గాత్రంతో, బుర్రకథలతో ప్రజలను మెప్పించిన మొగిలయ్య వరంగల్ జ్లిలా వాసి.ప్రస్తుతం ఆయన తీవ్ర అనారోగ్యంతో బాధపడుతున్నారు. దీంతో మెరుగైన వైద్యం కోసం ఆయనను హైదరాబాద్‌కు తరలించేందుకు కుటుంబసభ్యులు ఏర్పాట్లు చేస్తున్నారు.
అయితే గత కొంతకాలంగా ఆయన కిడ్నీ సంబంధిత వ్యాధులతో బాధపడుతున్న సంగతి తెలిసిందే. ఇప్పటికే రెండు కిడ్నీలు సరిగా పనిచేయకపోవడంతో వారానికి మూడుసార్లు ఆయనకు డయాలసిస్‌ చేస్తున్నారు. కాగా.. తన భర్తకు వైద్య సాయం అందించి.. తమ కుటుంబాన్ని ఆదుకోవాలని మొగిలయ్య భార్య కొమురమ్మ ప్రభుత్వాన్ని కోరుతున్నారు.
ఇటీవల విడుదలైన బలగం మూవీ క్లైమాక్స్‌లో మానవ సంబంధాను వివరిస్తూ ఆయన చేసిన గానం ప్రతీ ఒక్కరినీ కంటతడి పెట్టించింది. ఆ సన్నివేశమే సినిమాకు హైలెట్‌గా నిలిచింది. వరంగల్ జిల్లా దుగ్గొండి మండల కేంద్రానికి చెందిన పస్తం మొగిలయ్య, కొమురమ్మ దంపతులు బుర్ర కథలు చెబుతూ జీవనం సాగిస్తున్నారు. మొగిలయ్య గతకొంతకాలంగా అనారోగ్యంతో బాధపడుతున్నారు. వైద్యం చేయించుకునే ఆర్థిక స్తోమత లేక ఆపన్నహస్తం కోసం ఎదురుచూస్తున్నారు.
*సుజీవన్ వావిలాల*🖋️
కేసీఆర్ ఊరూరా దొంగలను తయారు చేస్తుండు: ఆకునూరి మురళి
బీఆర్ఎస్ నేతలు గాదరి కిషోర్, బాల్క సుమన్, ఎర్రోళ్ల శ్రీనివాస్ లు ఉద్యమకారులు కాదని..ఉద్యమ ద్రోహులు, దోపిడీ దొంగలని రిటైర్డ్ ఐఏఎస్ ఆకునూరి మురళి ఆరోపించారు. ఏప్రిల్ 10వ తేదీ సోమవారం ఆయన మీడియా సమావేశంలో మాట్లాడారు. తెలంగాణలో అక్రమంగా సంపాదించిన కోట్ల రూపాయలను సీఎం కేసీఆర్ ఇతర దేశాలకు పంపి అక్కడ ఆస్తులు కూడబెట్టుకుంటున్నారని మండిపడ్డారు. కేసీఆర్ రాష్ట్రంలో ఊరూరా దొంగలను తయారు చేస్తున్నారని అన్నారు. బీఆర్ఎస్ అవినీతి, అక్రమాలను.. విద్యావంతులు, స్టూడెంట్స్ ఊరూరా తిరుగుతూ ప్రజలకు తెలియజేయాలని కోరారు ఆకునూరి మురళి.
రాష్ట్ర అభివృద్ధికి రూ.16 లక్షల కోట్లు ఖర్చు చేసినట్లుగా లెక్కలు చెబుతున్నారు. కానీ తొమ్మిది సంవత్సరాలలో విద్యారంగానికి సీఎం కేసీఆర్ ఖర్చు చేసింది నామమాత్రమే అన్నారు ఆకునూరి మురళి. సీఎం కేసీఆర్ విద్యను కార్పోరేట్ సంస్థలకు ధారాదత్తం చేసేందుకు కుట్ర చేస్తున్నారు వ్యాఖ్యానించారు. పేదలకు ప్రభుత్వ విద్య అందకుండా సీఎం కేసీఆర్ నిర్వీర్యం చేస్తున్నారని విమర్శించారు. తెలంగాణ సంపద అంతా కొంత మంది చేతిలో బందీగా ఉందని దుయ్యబట్టారు.
తెలంగాణ పేద రాష్ట్రం కాదు..పాలకులు రాష్ట్రాన్ని అప్పుల పాలు చేశారని ఫైర్ అయ్యారు అకునూరి మురళి. రాష్ట్ర సంపదను ప్రజలకు అందకుండా చేస్తున్నారు..నిరుద్యోగులు ఎన్ని కష్టాలు వచ్చినా చదవటం వదిలిపెట్టవద్దు. ఎవరు ఆత్మస్థైర్యం కోల్పోవద్దని సూచించారు. ప్రభుత్వం బాధ్యతను విస్మరించి వ్యవహరిస్తోందని ఆకునూరి మురళి అన్నారు.
Courtesy by : SDF
*జాతీయ పార్టీగా గుర్తింపు పొందాలంటే.... ఓ రాజకీయ పార్టీకీ ఎలాంటి అర్హతలు ఉండాలి...?*
న్యూఢిల్లీ: సీపీఐ, ఎన్సీపీ, టీఎంసీలకు జాతీయ పార్టీల గుర్తింపును ఎన్నికల సంఘం రద్దు చేసిన విషయం తెలిసిందే. కొత్తగా అరవింద్ కేజ్రీవాల్ నేతృత్వంలోని ఆమ్‌ ఆద్మీ పార్టీకి ఈసీ జాతీయ హోదా ఇచ్చింది.అయితే ఓ రాజకీయ పార్టీ జాతీయ పార్టీగా గుర్తింపు పొందాలంటే.. ఎలాంటి అర్హతలు ఉండాలి? ఎన్ని ఎంపీ, ఎమ్మెల్యే సీట్లు గెలవాలి? ఎన్ని రాష్ట్రాల్లో ఉనికి ఉండాలి? అనే విషయాలు ఇప్పుడు చూద్దాం.
ఒక రాజకీయ పార్టీ జాతీయ పార్టీగా గుర్తింపు పొందాలంటే కనీసం నాలుగు రాష్ట్రాల్లో ఆ పార్టీ గుర్తింపు పొంది ఉండాలి. అసెంబ్లీ లేదా సార్వత్రిక ఎన్నికల్లో(లోక్‌సభ) నాలుగు రాష్ట్రాల్లో కనీసం 6శాతం ఓట్లు పొంది ఉండాలి. లేదా నాలుగు ఎంపీ సీట్లైనా గెలవాలి. లేదా లోక్‌సభలో రెండు శాతం సీట్లు కలిగిఉండాలి. కనీసం మూడు రాష్ట్రాల నుంచి ఆ పార్టీ ఎంపీలు ఎన్నికల్లో పోటీ చేసి విజయం సాధించి ఉండాలి. వీటిలో ఏ అర్హత ఉన్నా ఎన్నికల సంఘం ఓ రాజకీయ పార్టీని జాతీయ పార్టీగా గుర్తిస్తుంది.
*ప్రస్తుతం దేశంలో 6 జాతీయ పార్టీలు*
ప్రస్తుతం దేశంలో ఆరు పార్టీలకు జాతీయ హోదా ఉంది. బీజేపీ, కాంగ్రెస్, సీపీఎం, బహుజన సమాజ్‌ పార్టీ (బీఎస్పీ), నేషనల్‌ పీపుల్స్‌ పార్టీ,ఆమ్‌ ఆద్మీ పార్టీ ఈ జాబితాలో ఉన్నాయి. కొత్తగా జాతీయ హోదా పొందిన ఆప్‌ను అరవింద్ కేజ్రీవాల్ 2012లో స్థాపించారు. 2015, 2020లో జరిగిన ఢిల్లీ అసెంబ్లీ ఎన్నికల్లో, 2022లో పంజాబ్‌ అసెంబ్లీ ఎన్నికల్లో ఆప్‌ విజ యం సాధించింది.
1925లో ఏర్పాటైన సీపీఐ 1989లో జాతీయ పార్టీగా గుర్తింపు పొందింది. పశ్చిమ బెంగాల్, ఒడిశా అసెంబ్లీ ఎన్నికల్లో దెబ్బతినడం, దేశవ్యాప్తంగా కూడా తగిన సంఖ్యలో లోక్‌సభ సీట్లను సాధించలేకపోవడంతో జాతీయ హోదాను కోల్పోయింది.
జాతీయ హోదా కోల్పోయిన టీఎంసీని 1998లో మమతా బెనర్జీ స్థాపించారు. టీఎంసీ 2004లో రాష్ట్ర పార్టీ హోదా పొందింది. తర్వాత అరుణాచల్‌ ప్రదేశ్, మణిపూర్, త్రిపురకూ విస్తరించగా.. 2016లో జాతీయ పార్టీ హోదా వచ్చింది. కానీ తర్వాత పెద్దగా ప్రభావం చూపకపోవడంతో హోదా కోల్పోవాల్సి వచ్చింది.
శరద్‌పవార్‌ 1999 లో కాంగ్రెస్ నుంచి బయటికి వచ్చి ఎన్సీపీని స్థాపించారు. వివిధ ఎన్నికల్లో విజయం సాధించడంతో 2000 సంవత్స రంలో జాతీయ హోదా లభించింది.
*సుజీవన్ వావిలాల*🖋️
*BRS నుండి మాజీ MP మాజీ మంత్రి... సస్పెండ్....!*
హైదరాబాద్ : తెలంగాణ ముఖ్యమంత్రి కేసీఆర్, బీఆర్ఎస్ ప్రభుత్వంపై విమర్శలు గుప్పించిన మాజీ ఎంపీ పొంగులేటి శ్రీనివాస్ రెడ్డి, మాజీ మంత్రి జూపల్లి కృష్ణారావులను పార్టీ హైకమాండ్ సస్పెండ్ చేసింది.పార్టీ వ్యతిరేక కార్యకలాపాలకు పాల్పడిన కారణంగా సస్పెండ్ చేస్తున్నట్టు తెలిపింది. నిన్న కొత్తగూడెంలోని ప్రకాశం మైదానంతో తన మద్దతుదారులతో పొంగులేటి ఆత్మీయ సమావేశాన్ని నిర్వహించారు. ఈ సమావేశానికి జూపల్లి హాజరయ్యారు. ఈ సందర్భంగా పొంగులేటి మాట్లాడుతూ, కుటుంబ స్వార్థ రాజకీయ ప్రయోజనాల కోసమే కేసీఆర్ మూడో సారి సీఎం కావాలనుకుంటున్నారని ఆరోపించారు.
రాష్ట్ర ప్రజలు, కాంగ్రెస్, బీజేపీ పార్టీల సహకారంతోనే తెలంగాణ రాష్ట్రాన్ని సాధించుకున్నామన్న విషయాన్ని కేసీఆర్ మర్చిపోతున్నారని విమర్శించారు. టీఆర్ఎస్ స్థానంలో బీఆర్ఎస్ వచ్చినప్పుడే కేసీఆర్ గాడి తప్పారని అన్నారు. కేసీఆర్ శకం ముగియబోతోందని చెప్పారు. జూపల్లి మాట్లాడుతూ బీఆర్ఎస్ పేరుతో దేశానికి చెత్త పాలన ఇస్తారా?
అని ప్రశ్నించారు. సాగునీటి టెండర్లలో మాయాజాలం ప్రదర్శిస్తూ వేల కోట్ల రూపాయలను దోచుకుంటున్నారని విమర్శించారు. వీరి వ్యాఖ్యలను కేసీఆర్ సీరియస్ గా తీసుకున్నారు. ఇద్దరిపై వేటు వేశారు.
*సుజీవన్ వావిలాల*🖋️
*పత్రిక ప్రకటన* *మీడియా మిత్రులు అందరికీ నమస్కారం.*
డిపార్ట్మెంట్ ఆఫ్ మైన్స్ అండ్ జియాలజీ డైరెక్టర్ గారికి అక్రమ మైనింగ్ కి సంబంధించి నేను ఇచ్చిన ఫిర్యాదు ఆధారంగా విచారణజరుపుటకు
రేపు ఉదయం అనగా *11-04-2023,* 10:30 నిమిషాలకు అసిస్టెంట్ మైన్స్ ఆఫీసర్ తో పాటు సంగారెడ్డి జిల్లా ADM&G మరియు సర్వేయర్ తోపాటు లగ్డారం గ్రామానికి విచ్చేయనున్నారు, కావున మీడియా మిత్రులందరూ లగ్డారం గ్రామానికి 10:30 కల్లా రావలసిందిగా విజ్ఞప్తి చేస్తున్నాను.
*వి రవికృష్ణ*
న్యాయవాది
సామాజిక కార్యకర్త
అమీన్పూర్.
9618531012
*తెలంగాణ గడ్డపై భాజాపా ను అడుగు పెట్టినివ్వం... సిపిఐ -సీపీఎం....!*
హైదరాబాద్: భాజపా నుంచి దేశాన్ని రక్షించుకోవడానికి ఉమ్మడి పోరాటాలు చేస్తామని సీపీఎం, సీపీఐ ప్రకటించాయి. హైదరాబాద్‌లోని నాంపల్లి ఎగ్జిబిషన్‌ మైదానంలో నిర్వహించిన సంయుక్త సమ్మేళనంలో ఇరు పార్టీల ముఖ్యనేతలు, కార్యకర్తలు పాల్గొన్నారు.రాష్ట్రంలో భారాసతో కలిసి సాగుతామని, తెలంగాణ గడ్డపై భాజపాను అడుగు పెట్టనివ్వమని కమ్యూనిస్టులు నినదించారు. ప్రజా సమస్యలపై విడివిడిగా పోరాటం చేస్తున్న సీపీఐ, సీపీఎం తెలంగాణ వేదికగా ఏకమవుతున్నట్టు ప్రకటించాయి. సీపీఐ, సీపీఎం జాతీయ ప్రధాన కార్యదర్శులు డి.రాజా, సీతారాం ఏచూరి సహా ఇరుపార్టీల రాష్ట్ర కార్యదర్శులు, ముఖ్యనేతలు పాల్గొన్నారు. మొట్టమొదటి సారిగా సీపీఐ, సీపీఎం పార్టీల నేతలు సంయుక్తంగా సమావేశం నిర్వహించడం విశేషం.
రెండు పార్టీలు కలిసి పనిచేయడానికి ముందుకు రావడం పట్ల సీతారాం ఏచూరి హర్షం వ్యక్తం చేశారు. మోదీ సర్కారు భాజపాయేతర రాష్ట్రాల్లోని ప్రభుత్వాలను ఇబ్బందులకు గురిచేస్తోందని ఏచూరి ఆరోపించారు. దేశంలో రాజ్యాంగాన్ని, ప్రజాస్వామ్యాన్ని లౌకిక వాదాన్ని కాపాడుకోవాలంటే మోదీ సర్కారును గద్దె దించాలన్నారు. సీపీఐ జాతీయ ప్రధాన కార్యదర్శి డి.రాజా మాట్లాడుతూ.. దేశంలో అత్యంత అవినీతి ప్రభుత్వం నడుస్తోందన్నారు. ఒకే దేశం, ఒకే భాష, ఒకే పార్టీగా మారాలని మోదీ భావిస్తున్నారని ఆరోపించారు. రాజ్యాంగ సమాఖ్య వ్యవస్థలో కేంద్రం, రాష్ట్ర అధికారాలు వేర్వేరుగా ఉంటాయన్న డి.రాజా.. ఆ హక్కులను మోదీ ప్రభుత్వం కాలరాస్తోందని మండిపడ్డారు. తెలంగాణ సహా తమిళనాడు, కేరళలో గవర్నర్‌ను ఒక సాధనంగా కేంద్రం వాడుకుంటోందని ఆరోపించారు. గతేడాది విజయవాడలో ఉద్యమ పునరేకీకరణ జరగాలని ప్రతిపాదించగా ఇప్పటికి అది సాధ్యమవుతోందని హర్షం వ్యక్తం చేశారు. వచ్చే ఎన్నికల్లో మోదీ ప్రభుత్వాన్ని గద్దెదించటమే లక్ష్యంగా పనిచేయాలని సూచించారు. దేశం కోసం, కార్మికుల రక్షణ కోసం ఒక్కటై ముందుకు సాగాలని పిలుపునిచ్చారు.
*సుజీవన్ వావిలాల*🖋️
*సికింద్రాబాద్- తిరుపతి వందేభారత్ రైలును ప్రారంభించిన.... ప్రధాని మోదీ...!*
హైదరాబాద్: తెలుగు రాష్ట్రాల మధ్య మరో వందే భారత్‌ ఎక్స్‌ప్రెస్‌ రైలు పట్టాలెక్కింది. సికింద్రాబాద్ - తిరుపతి మధ్య నడవనున్న ఈ సెమీ హైస్పీడ్‌ వందేభారత్ ఎక్స్‌ప్రెస్‌ను శనివారం ప్రధాని నరేంద్రమోదీ 10వ నంబర్ ప్లాట్‌ఫాంపై జెండా ఊపి ప్రారంభించారు.ప్రారంభోత్సవంలో రైల్వే శాఖ మంత్రి అశ్వనీ వైష్ణవ్‌, గవర్నర్‌ తమిళిసై సౌందరరాజన్‌, మంత్రి తలసాని శ్రీనివాస్‌యాదవ్‌ ఉన్నారు.
ఈ రైలులో కొంతమంది విద్యార్థులు నల్గొండ వరకు ప్రయాణిస్తున్నారు. సికింద్రాబాద్ రైల్వే స్టేషన్‌కు చేరుకున్న ప్రధాని.. నేరుగా వందేభారత్ రైలు ఎక్కారు. అక్కడ ఉన్న విద్యార్థులతో కాసేపు ఆత్మీయంగా ముచ్చటించారు. అనంతరం జెండా ఊపి రైలును ప్రారంభించారు. ప్రారంభోత్సవం అనంతరం చేర్యాల పెయింటింగ్‌ను రైల్వే శాఖ మంత్రి ప్రధానికి అందించారు.
అంతకుముందు ఉదయం 11.30 గంటలకు ప్రత్యేక విమానంలో బేగంపేట విమానాశ్రయానికి చేరుకున్న ప్రధాని మోదీకి కేంద్ర మంత్రి కిషన్‌ రెడ్డి, గవర్నర్‌ తమిళిసై సౌందరరాజన్‌, భాజపా రాష్ట్ర అధ్యక్షుడు బండి సంజయ్‌, ఎంపీ లక్ష్మణ్‌, ఎమ్మెల్యే ఈటల రాజేందర్‌, రాష్ట్ర ప్రభుత్వం తరఫున మంత్రి తలసాని శ్రీనివాస్ యాదవ్‌, సీఎస్‌ శాంతికుమారి, డీజీపీ అంజనీకుమర్‌ స్వాగతం పలికారు. బేగంపేట నుంచి ఎస్పీజీ దళాల ప్రత్యేక కాన్యాయ్‌ పర్యవేక్షణలో మోదీ సికింద్రాబాద్ రైల్వే స్టేషన్‌కు చేరుకున్నారు.
సికింద్రాబాద్ - తిరుపతి మధ్య నడిచే (20701) రైలు సికింద్రాబాద్ రైల్వే స్టేషన్‌లో ఉదయం 6గంటలకు బయల్దేరి మధ్యాహ్నం 2.30గంటలకు తిరుపతి చేరుకుంటుంది. ఈ రైలు నల్గొండ, గుంటూరు, ఒంగోలు, నెల్లూరు స్టేషన్లలో ఆగుతుంది. అలాగే, తిరుపతి - సికింద్రాబాద్ (20702) రైలు తిరుపతి రైల్వేస్టేషన్‌ నుంచి మధ్యాహ్నం 3.15 గంటలకు బయల్దేరి రాత్రి 11.45 గంటలకు సికింద్రాబాద్ చేరుకుంటుంది. మంగళవారం మినహా మిగిలిన రోజుల్లో ఈ రైలు సేవలందిస్తుంది.ఈ రైలులో టికెట్ల ధరలను పరిశీలిస్తే..
సికింద్రాబాద్ నుంచి ఒక్కో స్టేషన్‌కు ఛార్జీలు ఇలా..
ఛైర్‌ కార్‌
• సికింద్రాబాద్ నుంచి నల్గొండ - రూ.470
• సికింద్రాబాద్ నుంచి గుంటూరు - రూ.865
• సికింద్రాబాద్ నుంచి ఒంగోలు - రూ.1075
• సికింద్రాబాద్ నుంచి నెల్లూరు - రూ.1270
• సికింద్రాబాద్ నుంచి తిరుపతి - రూ.1680
ఎగ్జిక్యూటివ్‌ ఛైర్‌ కార్‌ ఛార్జీలు
• సికింద్రాబాద్ నుంచి నల్గొండ - రూ.900
• సికింద్రాబాద్ నుంచి గుంటూరు - రూ.1620
• సికింద్రాబాద్ నుంచి ఒంగోలు - రూ.2045
• సికింద్రాబాద్ నుంచి నెల్లూరు - రూ.2455,
• సికింద్రాబాద్ నుంచి తిరుపతి - రూ.3080... ఈ ఛార్జీలకు టికెట్‌ బుకింగ్‌ కన్వీనియెన్స్‌ ఛార్జీలు అదనంగా ఉంటాయి.
*సుజీవన్ వావిలాల*🖋️
*యూకే యూఎస్ లను సినీ దర్శకులను వెనక్కి నెట్టిన.... బలగం వేణు....!*
ఇంటర్నెట్‌డెస్క్‌: ఒక సినిమా విజయం సాధించాలంటే మంచి కంటెంట్‌ ఉంటే చాలని.. కథలో సరైన భావోద్వేగాలు పండిస్తే భాషతో సంబంధం లేకుండా ప్రేక్షకులు బ్రహ్మరథం పడతారని మరోసారి నిరూపించిన చిత్రం 'బలగం' చిన్న ఆర్టిస్టులతో తెరకెక్కిన ఈ సినిమాకి అంతటా మంచి ఆదరణ లభిస్తోంది. ఈ క్రమంలోనే పలు అంతర్జాతీయ ఫిల్మ్‌ ఫెస్టివల్స్‌లోనూ దీని హవా కొనసాగిస్తోంది. ఇప్పటికే పలు అంతర్జాతీయ అవార్డులు అందుకున్న ఈ సినిమా తాజాగా అరౌండ్‌ ఇంటర్నేషనల్‌ అవార్డ్స్‌ - ఆమ్‌స్టర్‌డామ్‌ కార్యక్రమంలో మరో అవార్డు సొంతం చేసుకుంది. ఉత్తమ దర్శకుడి విభాగంలో వేణు దీనిని అందుకున్నారు. యూకే, యూఎస్, చైనా.. ఇలా పలు దేశాలకు చెందిన చిత్రాలు, దర్శకులను వెనక్కి నెట్టి వేణు ఈ అవార్డును అందుకోవడంపై సినీ ప్రియులు ఆనందం వ్యక్తం చేస్తున్నారు.ఇక, 'బలగం' ఇప్పటికే 'వాషింగ్టన్‌ డీసీ ఇంటర్నేషనల్‌ సినిమా ఫెస్టివల్‌', 'ఒనికో ఫిల్మ్‌ అవార్డు' వంటి పలు విదేశీ అవార్డులు అందుకున్న విషయం తెలిసిందే. తాజాగా వచ్చిన అవార్డుతో 'బలగం' ఖాతాలో ఏకంగా తొమ్మిది అవార్డులు చేరాయని దర్శకుడు వేణు పేర్కొన్నారు. ఈ సక్సెస్‌ను తనకు అందించిన సినీ ప్రియులకు ఆయన ధన్యవాదాలు తెలిపారు.
తెలంగాణ సంస్కృతి - సంప్రదాయాల నేపథ్యంలో 'బలగం' రూపుదిద్దుకుంది. కుటుంబ పెద్ద చనిపోయాక ఏర్పడిన పరిస్థితుల చుట్టూ ఈ కథను నడిపించారు. రక్త సంబంధాలు, బంధుత్వ విలువలను కళ్లకు కట్టినట్లు చూపించారు. ప్రియదర్శి, కావ్య కల్యాణ్‌ రామ్‌, సుధాకర్‌ రెడ్డి, రూపా లక్ష్మి తదితరులు ఈ సినిమాలో కీలకపాత్రలు పోషించారు. దిల్‌రాజు ప్రొడెక్షన్స్‌ పతాకంపై దిల్‌రాజు కుమార్తె, అల్లుడు హన్షీత, హర్షిత్‌ దీనిని నిర్మించారు. ప్రస్తుతం ఈ సినిమా అమెజాన్‌ ప్రైమ్‌ వేదికగా ప్రేక్షకులకు అందుబాటులో ఉంది.
*సుజీవన్ వావిలాల*🖋️
